Azərbaycan, Bakı, 27 oktyabr /Trend, müxbir K.Zərbalıyeva/
Azərbaycan Ali Məhkəməsi Plenumunun noyabrın 11-də keçiriləcək növbədənkənar iclasında həbsdə olan baş redaktor Eynulla Fətullayevlə bağlı işə baxacaq.
Ali Məhkəmədən çərşənbə günü Trend-ə verilən məlumata görə, Fətullayevlə bağlı Avropa Məhkəməsinin qərarı məhkəməyə daxil olub.
Aprelin 22-də İnsan Hüquqları üzrə Avropa Məhkəməsinin İnternet-səhifəsində Eynulla Fətullayevin Azərbaycana qarşı ərizəsi üzrə Avropa Məhkəməsinin qərarı dərc olunub.
Həmin qərarla məhkəmə Fətullayev barəsində cinayət işləri üzrə icraat zamanı insan hüquqlarının və əsas azadlıqlarının müdafiəsi haqqında Konvensiyanın müddəalarının pozulmasını qərara alıb. Eyni zamanda, məhkəmə qəbul etdiyi qərarla Fətullayevin dərhal həbsdən azad edilməsini tələb edib.
Avropa Məhkəməsi bir neçə gün əvvəl Eynulla Fətullayevin Azərbaycana qarşı iddiası ilə bağlı yekun qərarını açıqlayıb. Qərara görə, Fətullayev azadlığa buraxılmalı, ona 28 min avro təzminat ödənməlidir.
"Gündəlik Azərbaycan" və "Realnı Azerbaydjan" qəzetlərinin sabiq baş redaktoru Eynulla Fətullayev 2007-ci il aprelin 20-də həbs edilib. Sonradan baş redaktor terrora çağırış, milli ədavəti qızışdırma və vergidən yayınmada təqsirli bilinərək, 8 il 6 ay müddətinə azadlıqdan məhrum edilib.
2009-cu il dekabrın 30-da isə 12 saylı cəzaçəkmə müəssisəsində saxlanılan Fətullayevin üzərindən 0,223 qram həcmində heroin aşkarlanıb. Bu faktla bağlı ona qarşı Cinayət Məcəlləsinin 234.1-ci maddəsi ilə (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) cinayət işi qaldırılıb.
Ali Məhkəmədən verilən məlumata görə, Plenumun iclasında birinci instansiya məhkəmələrinə təyin olunan 78 hakim hakimlik fəaliyyətinə başlamaları ilə əlaqədar and içəcək.
