Azərbaycan, Bakı, 8 dekabr /Trend, müxbir M.Əliyev/
Azərbaycanın Ekologiya və Təbii Sərvətlər Nazirliyi meşələrdə yanğınların baş verməməsi üçün qabaqlayıcı tədbirlərə başlayıb.
Ekologiya və Təbii Sərvətlər Nazirliyinin Fövqəladə Hallar üzrə Tədbirlər Mərkəzinin direktor əvəzi Əfqan Həsənov çərşənbə günü Trend-ə bildirib ki, payız mövsümünün başa çatması ilə əlaqədar rayonların meşə təsərrüfatlarında toplanmış xəzəl adətən əhali tərəfindən yandırılır və nəzarətsiz qaldıqda həmin alov küləklə meşəyə yayılır.
"Yanğın ehtimalının qarşısının alınması məqsədilə nazirliyin əməkdaşları rayonlarda maarifləndirmə işlərinə başlayıblar", - Həsənov bildirib.
Onun sözlərinə görə, yerli ictimaiyyətlə görüşlərdə xəbərdarlıq olunur ki, meşə yanğınlarına səbəb olacaq hərəkətlərin edilməsində cinayət tərkibi var. Həsənov bildirib ki, ötən dövrlərdə baş vermiş yanğınlarla bağlı aparılmış araşdırmaların nəticəsindən toplanmış sənədlər məhkəmələrə təqdim edilib.
"Bələdiyyələrlə və icra nümayəndələri ilə birgə təşkil olunan tədbirlər məktəblərdə də keçirilir", - nazirlik nümayəndəsi bildirib.
Ekologiya və Təbii Sərvətlər Nazirliyi maarifləndirmə işlərini bir qayda olaraq ildə iki dəfə keçirir - yaz aylarında və payızın sonlarında - daha çox əhali tərəfindən yanğının törədilməsi olan vaxtlarda.
Azərbaycanın İsmayıllı, Şabran və digər rayonlarında 2010-cu il ərzində bir sıra meşə yanğınları baş verib. Yanğınların əsas səbəbi kimi əhalinin etinasızlığı göstərilir.
