Azərbaycan, Bakı, 29 dekabr /Trend, müxbir M.Əliyev/
Azərbaycan Milli Televiziya və Radio Şurası (MTRŞ) özəl kanallarda bəzi verilişlərin tamamilə və yaxud qismən dayandırılması ilə bağlı əlavə səlahiyyətlərin verilməsi barədə müvafiq qurumlara müraciət ünvanlayacaq. Bunu çərşənbə günü Trend-ə 2010-cu ilin yekunlarına dair verdiyi müsahibəsində MTRŞ sədri Nuşirəvan Məhərrəmli bildirib.
"Səlahiyyətlər qanunverici bazaya edilən dəyişikliklər əsasında həyata keçirilə bilər", - Məhərrəmli deyib.
MTRŞ sədri həmçinin regional və özəl televiziya kanallarına da dövlət tərəfindən yardımın ayrılması ilə bağlı iş aparıldığını bildirib.
"Necə ki, dövrü mətbuata KİV-lərin İnkişafına Dövlət Dəstəyi Fondu tərəfindən maliyyə vəsaiti ayrılır, eyni formada da özəl kanallarda bunu etmək olar - dövlətin sifarişi ilə Azərbaycanın tarixinə, mədəniyyətinə, coğrafiyasına, milli mənəvi dəyərlərinə uyğun verilişlər yerləşdirmək olar ki, bu da şou-biznes, bayağılıq tendensiyasını televiziyalarda azaltmaq istiqamətində addım ola bilər", - Məhərrəmli bildirib.
Şura sədri bildirib ki, 2010-cu ildə yeni televiziya və radio kanallarının açılması üçün lisenziyaların verilməsi prosesinə başlanılıb, Azərbaycanda rəqəmsal yayıma keçidlə bağlı televiziya və radio kanallarında maddi-texniki bazanın daha da gücləndirilməsi istiqamətində xeyli işlər görülüb.
"Amma 2010-cu ildə həm də özəl televiziya kanallarında Azərbaycanın milli mənəvi dəyərləri ilə bağlı verilişlər narahatçılıq doğuran formada inkişaf edib - şou xarakterli verilişlərin sayı artıb və MTRŞ da bundan narahatdır. Azərbaycanın tarixinə, ədəbiyyatına aid maarifləndirici verilişlərin bu cür kanallarda az olması bu gün narahatedici faktorlardandır", - Məhərrəmli bildirib.
MTRŞ sədri bildirib ki, 2011-ci ildə əksər televiziya kanallarında lisenziya müddəti bitir və televiziya kanallarının lisenziyasının uzadılması məsələsinə baxılacaq.
Azərbaycanda səkkiz ümumrespublika, 14 regional, 13 kabel televiziya kanalı var.