Azərbaycan, Bakı, 16 mart /Trend, müxbir T.Hacıyev/
İranda insan hüquqlarının vəziyyəti acınacaqlıdır və bundan ən çox əziyyət çəkən azərbaycanlılardır. Bu barədə "İranda insan haqlarının vəziyyəti" mövzusunda Trend Beynəlxalq İnformasiya Agentliyinin mətbuat mərkəzində keçirilən brifinqdə Cənubi Azərbaycandan olan Babək Muğanlı deyib.
Güney Azərbaycan Milli Oyanış Hərəkatının (GAMOH) Azərbaycan Respublikasındakı nümayəndəliyinin rəhbəri Ağrı Qaradağlının sözlərinə görə, İranda müxalifətin "yaşıl hərəkat"ı Güney Azərbaycan türklərinin proseslərə qoşulması üçün bütün vasitələrdən istifadə edir.
"Bu hərəkatın türklərə müsbət təsiri olmayacaq. Müstəqil Güney Azərbaycan dövlətinin qurulmasına nail olmaq üçün daxili proseslərə qoşulmamalıyıq", - o, deyib.
Yadulla Kənani isə bəyan edib ki, bütün dövrlərdə türklər İranda demokratiyanı dəstəkləyib, lakin hər dəfə onlara qarşı ədalətsizlik edilib: "İranda demokratik quruluş qurulmadan nəyəsə nail ola bilməyəcəyik. Ona görə də Tehranda başlanan hərəkata dəstək olmalıyıq".
Əjdər Tağızadə qeyd edib ki, İranda demokratiyanın beşiyi Güney Azərbaycandır.
"Azərbaycan Respublikasının yaranması ilə İranda çox şey dəyişib. Bu gün "yaşıl hərəkat"ın üzvləri internetdə cənubi azərbaycanlıları proseslərə qoşulmağa çağırırlar", - Tağızadə bildirib.