Azərbaycan Respublikasının Belçika Krallığındakı Səfirliyi və NATO yanında nümayəndəliyi tərəfindən Brüsseldə Azərbaycanın Ümummilli Lideri Heydər Əliyevin anadan olmasının 88-ci ildönümü ilə əlaqədar klassik musiqi gecəsi təşkil edilmidir. Bu barədə çərşənbə axşamı Trend-ə Azərbaycanın Belçika Krallığındakı Səfirliyindən məlumat verilib.
Qonaqları salamlayan Azərbaycanın Belçikadakı səfiri Emin Eyyubov Ümummilli Lider Heydər Əliyevin həyatı, keçdiyi siyasi yol, Azərbaycan xalqı qarşısında göstərdiyi unudulmaz xidmətlər barədə məlumat vermişdir.
Səfir Eyyubov bu il xalqımızın həm də Azərbaycan Respublikasının yaranmasının 20-ci ildönümünü geniş qeyd etdiyini xatırladaraq, Heydər Əliyevin dövlətçiliyimizin qurulmasında və mökəmləndirilməsində mühüm rolu barədə danışmış və onun uzaqgörən dövlətçilik siyasətinin bu gün Azərbaycan Respublikasının Prezidenti cənab İlham Əliyev tərəfindən uğurla davam etdirildiyini qeyd etmişdir.
Sonra qonaqlar skripkaçı, Avropa Mədəniyyət Parlamentinin üzvü Səbinə Rakçeyevanın və avstraliyalı pianoçu Fred Zangın ifasında Azərbaycan və Qərb bəstəkarlarının əsərlərini dinləmişlər. Gecədə Belçika ictimaiyyətinin nümayəndələri, millət vəkilləri, xarici ölkələrin səfirləri və təmsilçiləri, Azərbaycan və türk icmalarının nümayəndələri iştirak etmişlər.