Azərbaycan, Bakı, 26 may /Trend, müxbir K. Zərbalıyeva/
Azərbaycanda əcnəbilərin və vətəndaşlığı olmayan şəxslərin işə cəlb olunması qaydalarını pozan vəzifəli və hüquqi şəxslər inzibati məsuliyyətə cəlb olunacaqlar.
Milli Məclisdən cümə axşamı Trend-ə verilən məlumata görə, İnzibati Xətalar Məcəlləsinə əcnəbilər və vətəndaşlığı olmayan şəxslərlə bağlı əlavə və dəyişikliklər təklif olunub.
Əlavələrdən biri əcnəbilərin və vətəndaşlığı olmayan şəxslərin işə cəlb olunması qaydalarının pozulması ilə bağlıdır.
Təklif olunur ki, işəgötürən tərəfindən qanunvericiliyin tələbləri pozulmaqla fərdi icazə alınmadan əcnəbinin və ya vətəndaşlığı olmayan şəxsin işə cəlb edilməsinə görə, vəzifəli şəxslər 3 min manatdan 5 minatadək miqdarda, hüquqi şəxslər 30 min manatdan 35 min manatadək cərimə edilsin.
İXM-in işəgötürən tərəfindən qanunvericiliyin tələbləri pozulmaqla fərdi icazə alınmadan əcnəbinin və ya vətəndaşlığı olmayan şəxsin işə cəlb edilməsini nəzərdə tutan 53.8-ci maddəsi Məcəllədən çıxarılacaq.
Əcnəbilərin və ya vətəndaşlığı olmayan şəxslərin Azərbaycan Respublikasında qeydiyyatsız yaşaması və ya qanunsuz qalması ilə bağlı məsuliyyət nəzərdə tutan 330-cu maddəsinin də Məcəllədən çıxarılması təklif olunur.
İXM-in əcnəbilərin və vətəndaşlığı olmayan şəxslərin Azərbaycan Respublikasında olması, yaxud Azərbaycan Respublikası ərazisindən tranzitlə keçməsi qaydalarının pozulmasına görə məsuliyyət nəzərdə tutan 339-cu maddəsinə isə əlavə və dəyişiklər edilməsi təklif olunur.
Yeni layihədə təklif olunur ki, əcnəbi və ya vətəndaşlığı olmayan şəxsin Azərbaycan Respublikasında olma və ya yaşama hüququ verən sənədlər olmadan, habelə qeydiyyatsız yaşaması, etibarsız sənədlərlə Azərbaycan ərazisində olması və ya yaşaması, Azərbaycan ərazisində müvəqqəti olduğu və ya müvəqqəti yaşadığı dövrdə Azərbaycana gəlişinin bəyan edilmiş məqsədinə uyğun olmayan fəaliyyətlə məşğul olması onların inzibati məsuliyyətə cəlb edilməsi üçün əsas hesab edilsin.
Əlavələrdə qeyd olunur ki, əcnəbi və vətəndaşlığı olmayan şəxsin işə düzələrkən qanunvericilikdə müəyyən edilmiş qaydaları pozması, bir yerdən başqa yerə getmə və yaşayış yeri seçmə üçün qanunvericilikdə müəyyən olunmuş qaydaya əməl etməməsi, qanunvericiliklə müəyyən edilmiş qalma müddəti qurtardıqdan sonra getməkdən boyun qaçırması, Azərbaycan ərazisindən tranzitlə keçmə qaydalarına əməl etməməsi də inzibati məsuliyyət yaradır.
Bu pozuntulara yol verən əcnəbilər və vətəndaşlığı olmayan şəxslər Azərbaycan Respublikasının hüdudlarından kənara inzibati qaydada çıxarılmaqla və ya çıxarılmamaqla üç yüz manatdan dörd yüz manatadək miqdarda cərimə edilirlər.
Yeni layihə əcnəbiləri və ya vətəndaşlığı olmayan şəxsləri Azərbaycana dəvət etmiş və onlara yaşayış sahəsi vermiş Azərbaycan vətəndaşları və ya Azərbaycanda daimi yaşayan əcnəbilər və ya vətəndaşlığı olmayan şəxslərin də məsuliyyətini müəyyən edir.
Belə ki, yuxarıda qeyd olunan şəxslər əcnəbilər və vətəndaşlığı olmayan şəxslərin Azərbaycanda müvəqqəti olma müddətləri bitdikdən sonra müəyyən edilmiş qaydada ölkə ərazisindən çıxmasının təmin edilməsi üçün tədbir görmədiyi halda üç yüz manatdan dörd yüz manatadək miqdarda cərimə ediləcəklər.
Azərbaycanda əcnəbiləri və ya vətəndaşlığı olmayan şəxsləri qəbul edən, onlara xidmətlər göstərilməsini və ya onların işə qəbul olunmasını təmin edən və onların Azərbaycanda olması, yaşaması və ya Azərbaycan ərazisindən tranzitlə keçməsi şərtlərinə əməl edilməsi ilə əlaqədar vəzifələri yerinə yetirən müəssisə, idarə və təşkilatların vəzifəli şəxsləri tərəfindən qanunvericiliyin tələblərinin pozulması inzibati məsuliyyətə səbəb olacaq.
Həmin şəxslər tərəfindən əcnəbilərin və vətəndaşlığı olmayan şəxslərin qeydiyyata alınmasının və qeydiyyatdan çıxarılmasının, onlara Azərbaycanda olma və ya yaşama hüququ verən sənədlərin rəsmiləşdirilməsinin müəyyən edilmiş qaydalarının pozulmasına görə vəzifəli şəxslər 3 yüz manatdan 5 yüz manatadək miqdarda cərimələnirlər.
