Şahdağ Qış-Yay Kompleksi 2-3 ildən sonra tam hazır olacaq
Azərbaycan, Bakı, 11 iyul /Trend, müxbir İ.İsabalayeva/
Azərbaycanda dağ xizək və digər qış idman növləri ilə məşğul olmaq üçün geniş imkanlar yaradacaq Şahdağ Qış-Yay Kompleksi 2-3 ildən sonra tam hazır ola bilər. Bunu Trend-ə Mədəniyyət və Turizm Nazirliyinin turizm şöbəsinin müdiri Aydın İsmiyev deyib.
Onun sözlərinə görə, hazırda kompleksin tikintisi ilə bağlı işlər normal gedir. Kompleksin infrastrukturu isə hələ tamamilə hazır deyil.
"Kompleks çox nəhəng olacaq. Bu ilin sonuna qədər 1 hotelin tikintisi və bır sıra müəyyən işlərin görülməsi yekunlaşmalıdır. Bu, çox böyük layihədir. Onun icrasına vaxt lazımdır", - İsmiyev deyib.
Nazirlik rəsmisinin sözlərinə görə, Şahdağ Qış-Yay Kompleksinə oxşar yeni mərkəzlərin tikintisi hələlik nəzərdə tutulmayıb.
İsmiyev hesab edir ki, yalnız Şahdağ Kompleksinin tikintisi başa çatdıqdan sonra bu barədə fikirləşmək olar.
Şahdağ Milli Parkının ərazisində salınan Şahdağ Qış-Yay Turizm Kompleksinin inşasına 2009-cu ilin sentyabrında başlanılıb. Kompleks Qusar şəhərindən 30 kilometr şimalda - Dağlıq Alayan kəndi ərazisində yerləşəcək.
Kompleksdə tikinti işlərini yerli və xarici mütəxəssislərdən ibarət briqadalar yerinə yetirirlər.
Kompleks Qafqazda və MDB məkanında analoqu olmayan bir turizm mərkəzi olacaq.
Kompleks 5 min turisti eyni vaxtda qəbul edə biləcək. Beynəlxalq tədbirlərin təşkili üçün də burada müvafiq şəraitin yaradılması nəzərdə tutulub.
