Azərbaycan, Bakı, 4 avqust /Trend, müxbir İ.İsabalayeva/
2011/2012-ci tədris ili üçün Azərbaycanın ali təhsil müəssisələrinin boş qalan (vakant) yerlərinə əlavə yerləşdirmə üçün sənəd qəbulunun tarixi müəyyənləşdirilib. Bu barədə çümə axşamı Trend-ə Tələbə Qəbulu üzrə Dövlət Komissiyasının mətbuat xidmətinin rəhbəri Elnur Nağızadə deyib.
Onun sözlərinə görə, sənəd qəbulu avqustun 5-dən başlayacaq və avqustun 9-dək davam edəcək.
Vakant yerlərə əlavə yerləşdirmə elanı, müsabiqə şərtləri və boş qalan yerlərin sayı "Abituriyent" jurnalının sabah işıq üzü görəcək 7-ci sayında açıqlanacaq.
Azərbaycanın ali təhsil məktəblərinə tələbə qəbulu üçün aparılmış müsabiqənin nəticələri avqustun 3-də açıqlanıb.
Cari ildə ayrılmış 31419 plan yerinə 29332 abituriyent qəbul olub. Qəbul planı 93,36 faiz dolub. "Abituriyent" jurnalının 6-cı sayında müsabiqə nəticəsində ayrı-ayrı ixtisaslar üzrə formalaşmış keçid balları da təqdim olunub.