Azərbaycan, Bakı, 1 noyabr / Trend müxbir İ.İsabalayeva/
Azərbaycan Ekologiya və Təbii Sərvətlər Nazirliyi gələn il magistral yolların kənarlarının yaşıllaşdırılması və abadlaşdırılması ilə bağlı layihələr həyata keçirəcək. Bunu çərşənbə axşamı "Xəzər: Ətraf mühit üçün texnologiyalar" Beynəlxalq Ətraf Mühit Sərginin təşkili ilə bağlı Trend Beynəlxalq İnformasiya Agentliyinin konfrans zalında keçirilən mətbuat konfransında ETSN-in Ekologiya və təbiəti mühafizə siyasəti şöbəsinin müdiri Rasim Səttar-zadə deyib.
Onun sözlərinə görə, yaşıllaşdırma tədbirləri bir neçə istiqamətdə aparılacaq.
Magistral yolların kənarlarının yaşıllaşdırılması və abadlaşdırılması şimal, qərb, cənub istiqamətləri üzrə həyata keçiriləcək.
Səttar-zadə bildirib ki, ETSN növbəti ildə Abşeron yarımadasının müxtəlif yerlərində yaşıllaşdırma tədbirləri və müasir suvarma sistemlərinin quraşdırılması, tullantı sularının suvarmada təkrar istifadəsi layihələrini həyata keçirməyi nəzərdə tutur.