Azərbaycan, Bakı, 4 fevral / Trend, müxbir H.Vəliyev /
"AzərSığorta" dövlət sığorta şirkətinin sığorta xidmətlərindən ölkənin poçt rabitəsi operatoru "Azərpoçt" MMC-nin filiallarında da istifadə etmək mümkün olacaq. Bu barədə şənbə günü Trend-ə "Azərpoçt"dan deyiblər.
Hazırda bu sığortaçının xidmətlərinin poçt operatorunun filial şəbəkəsində açılması məsələsi danışıqlar mərhələsindədir.
Həmçinin "Azərpoçt" sığorta xidmətlərinin təşkili məqsədilə Azərbaycanın başqa iri sığortaçıları ilə də danışıqlar aparır.
Hələlik "Azərpoçt" şəbəkəsi "Atəşgah Sığorta" və "Ata Sığorta" sığorta şirkətlərinin xidmətləri üçün açıqdır.
"Azərpoçt"un poçt şöbələri və filialları vasitəsilə sığorta edilənlərə könüllü və icbari sığorta üzrə xidmətlər göstərilir.
"Azərpoçt" sığorta şirkətləri ilə əməkdaşlıq edərək sığortaçıların agenti kimi çıxış edir ki, bu da həm operator, həm də sığortaçılar üçün sərfəlidir.
