Azərbaycan, Bakı, 1 mart /Trend, müxbir İ.İsabalayeva/
Ermənistan hökuməti bu gündən "Metsamor" Atom Elektrik Stansiyasının idarə olunması ilə bağlı Rusiyanın "İnter RAO" şirkəti ilə bağladığı müqaviləyə xitam verib.
Trend-in cümə axşamı Rusiya KİV-lərinə istinadən verdiyi məlumata görə, "İnter RAO" şirkəti "Metsamor" AES-i 2003-cü ildən idarə edir. Sonuncu müqavilə 2013-cü ilin sentyabrınadək nəzərdə tutulmuşdu.
Hələ 2011-ci ilin noyabrında məlumat verilmişdi ki, Rusiya şirkəti etibarnamə ilə idarəetmənin şərlərindən narazı olduğu üçün Ermənistan tərəfdaşları ilə danışıqlara başlayıb. Bundan sonra isə Ermənistan tərəfi "İnter RAO"-nun AES-lə bağlı öz öhdəliyini yerinə yetirdiyini, buna görə də rusiyalı energetiklərlə müqavilənin dayandırıla biləcəyini bəyan etmişdi.
Ermənistan iddia edir ki, AES-i bütün gücü ilə idarə edə biləcək.