Azərbaycan, Bakı, 17 may /Trend, müxbir İ.İsabalayeva/
Tələbə Qəbulu üzrə Dövlət Komissiyası (TQDK) Rusiyanın ali məktəblərinə keçirilən qəbul imtahanlarında iştirak edəcək azərbaycanlı gənclər üçün "Abituriyentin imtahana buraxılış vərəqəsi"nin verilməsinə başlayıb.
Komissiyadan cümə axşamı Trend-ə verilən məlumata görə, 2012/2013-cü tədris ilində Rusiyanın ali təhsil müəssisələrində Azərbaycan vətəndaşları üçün ayrılmış yerlərə sənəd verən abituriyentlər "Buraxılış vərəqəsi"nin çap edilməsi üçün www.tqdk.gov.az saytına daxil olmalıdırlar.
Rusiyanın ali məktəblərinə qəbul imtahanı mayın 18-də keçiriləcək. İmtahan nəticəsində müsabiqə şərtini ödəyərək növbəti mərhələdə iştirak hüququ qazanan abituriyentlər mayın 19-da TQDK-da təşkil olunacaq müsahibədə iştirak edəcəklər.
2012/2013-cü tədris ili üçün Rusiya ali təhsil müəssisələrində Azərbaycan vətəndaşları üçün ayrılmış yerlərə 101 nəfər sənəd verib.
Test imtahanı nəticəsində I ixtisas qrupunda 300 və daha yüksək, digər qruplarda 400 və daha yüksək bal toplayan abituriyentlər II mərhələyə - müsahibəyə buraxılacaqlar.
Müsahibədən məqbul alan abituriyentlər ixtisas seçiminə buraxılırlar.
Müsabiqə test imtahanın nəticələrinə əsasən aparılacaq.