Azərbaycan, Bakı, 15 sentyabr /Trend/
Milli Təhlükəsizlik Nazirliyinin (MTN) Heydər Əliyev adına Akademiyasında 15 sentyabr - Bilik Gününə həsr olunmuş təntənəli mərasim keçirilib. Əvvəlcə əlaçı kursantlar tərəfindən Dövlət bayrağı qaldırılıb və Dövlət himni səsləndirilib.
Nazirliyin İctimai Əlaqələr Mərkəzindən şənbə günü Trend-ə verilən məlumata görə, Akademiya rəisinin birinci müavini, general-mayor Şahin Sultanov yeni tədris ilinin başlanması münasibətilə professor-müəllim heyətini, dinləyiciləri və kursantları təbrik edərək onlara uğurlar arzulayıb. Sultanov müstəqillik illərində Azərbaycanın əldə etdiyi nailiyyətlərdən və təhsilə göstərilən dövlət qayğısından danışıb, ümummilli lider Heydər Əliyevin zəngin dövlətçilik irsinin layiqli davamçısı Prezident İlham Əliyevin bu istiqamətdə atdığı addımları xüsusi qeyd edib. Gündən-günə inkişaf edən, qüdrətlənən, nüfuzu artan və söz sahibi olan ölkəmizin son illər beynəlxalq əhəmiyyətli siyasi, iqtisadi, idman və sair tədbirlərə ev sahibliyi etməsinin sadalanan nailiyyətləri daha da zənginləşdirdiyi vurğulanıb. Respublikamızın BMT-nin 155 üzv dövlətinin dəstəyini qazanaraq bu təşkilatın Təhlükəsizlik Şurasına qeyri-daimi üzv seçilməsi, "Eurovision 2012" mahnı müsabiqəsinə ev sahibliyi etməsi, London Yay Olimpiya Oyunlarında qazandığı uğurlar və digər nailiyyətlər ölkə vətəndaşlarında hədsiz iftixar hissləri doğurub.
General-mayor Şahin Sultanov ölkə üzrə qazanılan uğurların Milli Təhlikəsizlik Nazirliyi və onun Heydər Əliyev adına Akademiyasından da yan keçmədiyini bildirib. Milli təhlükəsizlik naziri general-leytenant Eldar Mahmudovun birbaşa nəzarəti və himayəsi altında bu mötəbər elm ocağının tədris bazası daha da möhkəmlənib, təhsil prosesində müasir dünya standartları geniş tətbiq olunub, əməkdaşların sosial vəziyyəti və xidmət şəraiti xeyli yaxşılaşdırılıb. Boloniya prosesinə qoşulan Azərbaycanda bu gün təhsil sistemi Qərb standartlarına uyğunlaşdırılıb, Akademiya da öz növbəsində bu proseslərdən kənarda qalmayıb.
Akademiya tarixində ən əlamətdar gün kimi Prezident İlham Əliyevin 20 dekabr 2005-ci il tarixli fərmanı ilə bu təhsil ocağına ümummilli lider Heydər Əliyevin adının verilməsinin olduğunu bildirən natiq, burada bütün işlərin ulu öndərin adına layiq qurulduğunu vurğulayıb. Kursantlara daim yüksək nizam-intizam, nümunəvi davranış nümayiş etdirməyi, tədrisə məsuliyyətlə yanaşmağı, Vətənə, xalqa, dövlətə sədaqətli olmağı tövsiyə edən Sultanov bidirib ki, həyatının 25 ilini təhlükəsizlik orqanlarında xidmətə həsr etmiş ümummilli lider Heydər Əliyevin ömür yolu hamı üçün bir örnək, həyat məktəbi olmalıdır. Müasir tələblərə cavab verən, hərtərəfli hazırlıqlı zabit kimi yetişmək üçün ulu öndərin azərbaycançılıq irsini mənimsəmək hər bir kursantın vətəndaşlıq borcudur.
Sultanov bu xüsusi təyinatlı ali təhsil müəssisəsində yaradılmış yüksək şəraitə, daimi diqqət və qayğıya görə Ali Baş Komandan İlham Əliyevə və Milli Təhlükəsizlik Nazirliyinin rəhbərliyinə Akademiyanın şəxsi heyəti adından dərin minnətdarlığını bildirib.
Tədbirin sonunda kursantlar təntənəli marşla tribunanın önündən keçərək biliklərə yiyələnmək üçün auditoriyalara yollanıb və Akademiyada yeni tədris ili başlayıb.