Azərbaycan, Bakı, 26 noyabr /Trend, müxbir İ.İsabalayeva/
Azərbaycan Milli Elmlər Akademiyası Geologiya İnstitutunda "Neft-qazın geologiyası" adlı baza kafedrası yaradılıb.
Geologiya İnstitutunun mətbuat xidmətindən çərşənbə günü Trend-ə verilən məlumata görə, kafedra Azərbaycan Dövlət Neft Akademiyası (ADNA) ilə bağlanmış müqaviləsi əsasında yaradılıb. Kafedrada geologiya mühəndisliyi ixtisasının tədris planına uyğun bakalavriat və magistratura səviyyəsində elmi-tədqiqat işləri aparılacaq. Dərslər Geologiya İnstitutunun alimləri tərəfindən keçiriləcək.
AMEA-nın vitse-prezidenti, Geologiya İnstitutunun direktoru akademik Akif Əlizadənin sözlərinə görə, baza kafedrası gənc mütəxəssislərin yetişdirilməsi və neft-qaz geologiyası elminin inkişafı məqsədi ilə təşkil olunub. Burada ADNA-nın doktorantları da təhsil ala biləcək.