Azərbaycan, Bakı, 15 fevral /Trend, müxbir E.Tariverdiyeva/
Rusiyanın Azərbaycandakı səfirliyində Stalinqrad döyüşünün 70 illiyinə həsr edilmiş tədbir keçirilib. Trend-in məlumatına görə, tədbirə Böyük Vətən müharibəsinin iştirakçıları və veteranları dəvət edilib.
RF-nin Azərbaycandakı səfiri Vladimir Doroxinin sözlərinə görə, Stalinqrad döyüşü Böyük Vətən müharibəsinin dönüş anı olub və öz həyatını vətən yolunda qurban verənlərin, o cümlədən azərbaycanlıların xatirəsi müqəddəsdir.
"Azərbaycanlılar Stalinqrad döyüşündə fərqləniblər. Məşhur qəhrəmanlardan biri Həzi Aslanov olub. Habelə Azərbaycanda insanlar cəbhəni neftlə təmin etmək üçün işləyiblər", - Doroxin bildirib.
Tədbir zamanı Stalinqrad döyüşünün iştirakçılarına səfirlikdən maddi yardımlar və Azərbaycan sanatoriyalarına putyovkalar təqdim edilib.