Azərbaycanda dörd nəfərin ölümü ilə nəticələnən yol qəzası törətmiş sürücüyə hökm oxunub

Azərbaycan, Bakı, 12 iyul /Trend, müxbir A.Məmmədov/

Şəki Ağır Cinayətlər Məhkəməsində dörd nəfərin ölümü ilə nəticələnən yol qəzası törətmiş Naxçıvan Muxtar Respublikasının Şərur rayonunun Şəhriyar kəndində anadan olmuş 1984-cü il təvəllüdlü İlkin Rəhimovun cinayət işi üzrə məhkəmə başa çatıb.

Trend-in məlumatına görə, hakim Elxan Süleymanovun sədrliyi ilə keçirilən prosesdə təqsirləndirilən şəxsə hökm oxunub. Məhkəmənin hökmü ilə İlkin Rəhimov 8 il 6 ay müddətinə azadlıqdan məhrum edilib.

İttihama görə, 7 avqust 2012-ci il tarixdə saat 14:50 radələrində Yevlax-Zaqatala-Gürcüstan sərhədi yolunun Şəki rayonu ərazisindən keçən 59-cu km-də 1961-ci il təvəllüdlü Zaqatala rayon sakini Əhmədov Məhəmməd Əhməd oğlunun idarə etdiyi "Mercedes-Benz" markalı, "10-NL-686" dövlət qeydiyyat nişanlı minik avtomobili ilə 1982-ci il təvəllüdlü Naxçıvan MR-in sakini Rəhimov İlkin Elbəyi oğlunun idarə etdiyi "SHACMAN" markalı, "01-AD-098" dövlət qeydiyyat nişanlı yük avtomobili toqquşub.

Qəza nəticəsində "Mercedes-Benz" markalı avtomobilin sürücüsü və avtomobildə olan sərnişinlər - 1983-cü il təvəllüdlü Bakı şəhər sakini İmanov Vüqar Mais oğlu, 1981-ci il təvəllüdlü Zaqatala rayon sakini Aslanov Elburus Nurəddin oğlu və 1963-cü il təvəllüdlü Rusiya Federasiyasının vətəndaşı Morodze Eldar Zeynal oğlu aldıqları xəsarətlərdən hadisə yerində ölüblər.

İstintaq araşdırması zamanı İlkin Rəhimovun yol qəzasının törətməsində günahkar olması müəyyən edilib. Onun barəsində Cinayət Məcəlləsinin 263.3-cü (yol hərəkəti və nəqliyyat vasitələrinin istismarı qaydalarını pozma ehtiyatsızlıqdan iki və ya daha artıq şəxsin ölümünə səbəb olma) maddəsi ilə cinayət işi başlanıb.