Azərbaycan, Bakı, 30 oktyabr /Trend, müxbir İ.İsabalayeva/
Azərbaycanda müxtəlif növ yeni uşaq bağçaları yaradılacaq. Trend-in məlumatına görə, bu, Milli Məclisə daxil olan, 2014-2017-ci illəri əhatə edən ortamüddətli iqtisadi-sosial inkişaf konsepsiyası layihəsində öz əksini tapıb.
Konsepsiya layihəsinə əsasən, dövlət uşaq bağçaları şəbəkəsinin genişləndirilməsi, onların şərait və təchizatının yaxşılaşdırılması ilə yanaşı, müxtəlif mülkiyyət formasına aid olan məktəbəqədər təhsil müəssisələrinin - bələdiyyə, icma, özəl və ailə bağçalarının yaradılması nəzərdə tutulur.
Bununla yanaşı, layihəyə əsasən, 2017-ci ilədək Azərbaycanda məktəbəqədər təhsil xidmətlərinin keyfiyyətinin monitorinqi və qiymətləndirmə sistemi yaradılacaq. Məktəbəqədər təhsil müəssisələri İKT avadanlığı ilə təmin ediləcək, pedaqoji heyət üçün İKT üzrə təlim təşkil olunacaq.