Azərbaycan, Bakı, 10 noyabr /Trend/
Bosniya və Herseqovinada Nizami Gəncəvi Beynəlxalq Mərkəzinin dəstəyi ilə beynəlxalq forum keçirilib. Bu barədə Trend-ə Diasporla İş üzrə Dövlət Komitəsindən Trend-ə verilən məlumatda bildirilir.
Sarayevoda sabiq Baş Nazir Zlatko Lagumdzijanın rəhbərlik etdiyi Müştərək Cəmiyyətlər və Dəyərlər təşkilatının noyabrın 6-da keçirdiyi "Gələcəyə baxış - Dayton razılaşmasından 20 il sonra" adlı forumunda Nizami Gəncəvi Beynəlxalq Mərkəzinin nümayəndələri də qoşulub.
Tədbirin iştirakçıları Dayton razılaşmasından keçən iyirmi il ərzində Balkan regionunda, xüsusəndə Bosniya və Herseqovinada baş vermiş proseslər, qarşıda yarana biləcək problemlər və onların həlli yolları müzakirə edilib. Müzakirələrə Hollandiyanın sabiq baş naziri Vim Kok, Avstriyanın sabiq Kansleri Alfred Gusenbauer, Latviyanın sabiq prezidenti Valdis Zatlers, Bosniya və Herzegovinanın sabiq Baş Naziri Zlatko Lagumdzija və Bosniya Herzegovinanın rəsmiləri, diplomatik korpus nümayəndələri qatılıblar.
Forum çərçivəsində 2016-cı ilin mart ayında təşkil olunacaq 4-cü Qlobal Bakı Forumuna hazırlıq məqsədi daşıyan bir sıra görüşlər keçirilib. Mərkəzin Baş Katibi Rövşən Muradov Bosniya və Herseqovinanın Prezidenti Mladen İvaniçla görüşərək Qlobal Bakı Forumuna hazırlıq prosesi haqqında məlumat verib və həmsədrlərin ünvanladığı rəsmi dəvət məktubunu təqdim edib.
M.İvaniç dəvəti qəbul edərək 4-cü Bakı Forumunda iştirakını təsdiqləyib və Nizami Gəncəvi BM-nin Bosniya və Herseqovinada yüksək səviyyəli toplantı keçirməyə dəvət edib. Qeyd edək ki, Bosniya və Herseqovinanın Prezidenti M.İvaniç Mərkəzin Bolqarıstanın paytaxtı Sofiyada oktyabr ayında keçirilən ali səviyyəli forumunda iştırak edib.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
