Bakı. Trend:
İSESCO İcraiyyə Şurasının Bakıda keçirilən 36-cı sessiyası Küveyt mətbuatında geniş işıqlandırılıb. Bu barədə Trend-ə Azərbaycanın Küveytdəki səfirliyindən verilən məlumatda bildirilir.
Məlumatda qeyd olunur ki, Küveyt kütləvi informasiya vasitələrinin 24 noyabr tarixli buraxılışlarında hazırda Bakıda keçirilən İslam Təhsil, Elm və Mədəniyyət Təşkilatının (İSESKO) 12-ci Baş Konfransı və 35-ci iclası barədə geniş məlumatlar dərc olunub.
Konfransda iştirak edən Təhsil, Elm və Mədəniyyət üzrə Küveyt Milli Komissiyasının Baş katibi (UNESKO) Əhməd Əl-Enezinin Küveytin "KUNA" xəbərlər agentliyinə verdiyi məlumatda, konfrans iştirakçılarına yüksək qonaqpərvərliyin göstərildiyi, iclasın yüksək səviyyədə keçirildiyi bildirilib. Eyni zamanda o, iclasda ISESCO-nun qazandığı uğurlardan və qarşıda duran vəzifələrdən bəhs olunacağı, İSESKO-nun ötən üç il üçün fəaliyyətinə dair Baş Direktorun hazırladığı hesabatın müzakirə olunacağı və qarşıdakı 2016-2018-ci illər üçün fəaliyyət planının təsdiqlənəcəyi barədə məlumat verib.
İslam Təhsil, Elm və Mədəniyyət Təşkilatının (İSESKO) 12-ci Baş Konfransı və 35-ci iclası barədə Küveytdə gündəlik ərəb dilində nəşr olunan və böyük oxucu kütləsinə malik "Əl-Siyəsə", "Əl-Ənbə" və "Əl-Qabas" qəzetlərində də məlumatlar dərc olunub.
Təhsil, Elm və Mədəniyyət üzrə Küveyt Milli Komissiyasının Baş katibi (UNESKO) Əhməd Əl-Enezi ilə yanaşı, Konfransda Təhsil və Ali təhsil nazirinin müavini Haitham Saleh Aalathar da iştirak edir.