...

Binəqədidə Azərbaycan Ordusunun yaranmasının 100 illiyi qeyd olunub (FOTO)

Cəmiyyət Materials 22 İyun 2018 16:32 (UTC +04:00)
“N” saylı hərbi hissədə Milli Ordunun yaranmasının 100-cü ildönümünə həsr edilmiş tədbir keçirilib.
Binəqədidə Azərbaycan Ordusunun yaranmasının 100 illiyi qeyd olunub (FOTO)

Bakı. Trend:

Binəqədi rayonunda Fövqəladə Hallar Nazirliyinin Biləcəri qəsəbəsində yerləşən “N” saylı hərbi hissəsində Milli Ordunun yaranmasının 100-cü ildönümünə həsr edilmiş tədbir keçirilib.

Trend-in məlumatına görə, tədbirdə Binəqədi Rayon İcra Hakimiyyəti (RİH) başçısının müavini Aygün Əliyeva, İctimai-siyasi və humanitar məsələlər şöbəsinin müdiri Elman Dadaşov, Fövqəladə Hallar Nazirliyinin Mülki Müdafiə Qoşunları Hərbi Hissə komandirinin müavini polkovnik-leytenant Zabil Əliyev, Binəqədi rayon Gənclər və İdman İdarəsinin rəisi Elvin Aslanov, Fövqəladə Hallar Nazirliyinin Mülki Müdafiə Qoşunları Hərbi Hissəsinin zabit və əsgər heyəti iştirak edib.

Binəqədi rayon Gənclər və İdman İdarəsinin rəisi E.Aslanov tədbiri açıq elan edərək son illər ərzində Azərbaycanın hərbi potensialını xeyli artdığını, ölkəmizə ən müasir silah-sursat, texnika, avadanlıqların gətirildiyini və hazırda maddi-texniki təchizat və döyüş qabiliyyəti baxımından Azərbaycan Silahlı Qüvvələrinin Cənubi Qafqazın ən güclü ordusu olduğunu qeyd edib. Çıxış edən polkovnik-leytenant Z.Əliyev ümummilli lider Heydər Əliyev siyasətinin layiqli davamçısı olan Azərbaycan Prezidenti, Silahlı Qüvvələrin Ali Baş Komandanı İlham Əliyevin orduya göstərdiyi diqqət və qayğı nəticəsində Silahlı Qüvvələrimizin son illər sürətlə inkişaf ediyini, bu gün ordu quruculuğunun dövlət başçısının diqqət mərkəzində olduğunu bildirib

Binəqədi RİH başçısının müavini A.Əliyeva Aprel döyüşlərinin dövlətimizin, ordumuzun gücünü və qüdrətini düşmənə və bütün dünyaya nümayiş etdirdiyini deyib. Natiq düşmən təxribatlarının qarşısını almaq məqsədilə Silahlı Qüvvələrimizin bölmələrinin keçirdiyi əks-hücum əməliyyatı nəticəsində işğal altındakı mühüm əhəmiyyətə malik yüksəkliklərin azad edildiyini, bu döyüşlərdə zabit və əsgərlərimizin göstərdiyi rəşadətin xalqımızın yaddaşında həkk olunduğunu, Aprel hadisələri zamanı Silahlı Qüvvələrimizə ən yüksək qiyməti Ali Baş Komandan İlham Əliyevin verdiyini deyib.

Sonda ordu sıralarında xidmətdə fərqlənən bir qrup zabit və əsgər Binəqədi RİH və Binəqədi rayon Gənclər və İdman İdarəsinin Fəxri fərmanları ilə təltif edilib. Tədbir tanınmış sənət nümayəndələrinin ifasında musiqili proqramla davam etdirilib.

Məqalədə:
Xəbər lenti

Xəbər lenti