...

Azərbaycanda çantada daşına bilən minilaboratoriyaların istehsalı təklif edilir

Cəmiyyət Materials 18 Noyabr 2018 08:07 (UTC +04:00)
Azərbaycanlı alim tədqiqatçılar üçün evdə də tədqiqatlar aparmağa imkan verən minilaboratoriya yaradıb.
Azərbaycanda çantada daşına bilən minilaboratoriyaların istehsalı təklif edilir

Bakı. İlhamə İsabalayeva - Trend:

Azərbaycanlı alim tədqiqatçılar üçün evdə də tədqiqatlar aparmağa imkan verən minilaboratoriyaların istehsalını təklif edir.

Azərbaycan Texniki Universitetinin tədris ustası Rəşid Əliyev Trend-ə bildirib ki, onun tərəfindən tələbə və tədqiqatçılar üçün evdə də tədqiqatlar aparmağa imkan verən analoq və rəqəmli elektronika minilaboratoriya cihazı yaradılıb.

Mütəxəssisin sözlərinə görə, bu cihaz "Elenco" firması tərəfindən təhsil üçün istehsal olunan XK-150 tipli minilabın təkmilləşdirilmiş prototopidir. Lisey və universitetlərdə geniş tətbiq oluna bilən bu miniaboratoriyanın elektronika, avtomatika, mexatronikanın öyrənilməsində böyük əhəmiyyəti var.

R.Əliyev qeyd edib ki, minilaboratoriyanın imkanları hesabına 400 sxem yığmaq və laboratoriya işi görmək olur:

"Minilaboratoriyanı hər bir tələbə özü də alaraq evdə işləyə bilər. Minilaboratoriyanın üstünlüyü ondadır ki, adi laboratoriya şəraitində məhdud zaman çərçivəsində geniş işlər görmək mümkün olmur. Amma çantada da daşına biləcək belə minilaboratoriyalar tələbəyə evdə də istədiyi qədər iş görməyə imkan verir. Biz həm də internet resurs yaradacağıq. Tələbə evdə oturaraq virtual dərslərlə kafedra ilə əlaqə saxlaya bilər. Mən artıq skayp vasitəsilə tələbə ilə əlaqə saxlayaraq onun sxemlərinin düzəldilməsi üçün müəyyən göstərişlər də vermişəm".

Bu layihənin sənayeləşməsini təklif edən R.Əliyev qeyd edib ki, bu kimi layihələrin reallaşması Azərbaycana özünün formalaşdırdığı insan kapitalı sayəsində milli sənayenin inkişafına təkan verər: "Biz bu layihəni Azərbaycanda da istehsal edə bilərik. Bu halda o, ABŞ istehsalından ucuz başa gələ bilər və onun qiyməti maksimum 200 manata olar. Digər tərəfdən, belə laboratoriyaların istifadə müddəti uzunömürlü - 30-40 il olur".

Məqalədə:
Xəbər lenti

Xəbər lenti