Bakı. İlhamə İsabalayeva – Trend:
Müəllimlərin mərkəzləşdirilmiş qaydada işə qəbulu prosesinin iyulun ikinci yarısı- avqustun əvvəlində həyata keçirilməsi nəzərdə tutulur.
Trend-in məlumatına görə, bunu Nazirlər Kabineti yanında Operativ Qərargahın keçirdiyi brifinqdə Təhsil naziri Ceyhun Bayramov deyib.
Nazirin sözlərinə görə, bu müsabiqənin ötənilki formatda keçirilməsi planlaşdırılır.
C.Bayramov əlavə edib ki, əmək müqavilələrinin daimiləşdirilməsi üçün müsabiqəyə qatılan 1400-ə yaxın namizədin 91 faizi müsahibədən onlayn şəkildə keçmək istədiyini bildirib. Mayın 15-dək onlayn müsabiqə başa çatacaq. Bunun ənənəvi formatda keçirilməsini istəyənlər üçün isə iyunda müsabiqələr keçiriləcək.
Nazir bildirib ki, bu il də müəllimlərin yerdəyişməsi müsahibəsinin iyunda keçirilməsi ilə bağlı heç bir problem yoxdur.