...

Peşəyə müstəqil yiyələnənlər də təhsil sənədi alacaq - Qiymətləndirilmə başlandı

Cəmiyyət Materials 6 Avqust 2020 13:22 (UTC +04:00)
Peşə təhsili üzrə qeyri-formal və informal təhsil formaları ilə bağlı qiymətləndirilmə həyata keçiriləcək
Peşəyə müstəqil yiyələnənlər də təhsil sənədi alacaq -  Qiymətləndirilmə başlandı

Bakı. İlhamə İsabalayeva - Trend:

Təhsildə Keyfiyyət Təminatı Agentliyi tərəfindən vətəndaşların peşə təhsili üzrə qeyri-formal və informal təhsil formaları vasitəsilə əldə etdikləri bilik, bacarıq, səriştə və təcrübənin qiymətləndirilməsi, eyni zamanda tanınması prosesinə başlanılacaq.

Təhsil Nazirliyindən Trend-ə verilən məlumata görə, proses Nazirlər Kabinetinin 5 avqust 2020-ci tarixli qərarı ilə təsdiqlənmiş “Vətəndaşların peşə təhsili üzrə qeyri-formal və informal təhsil formaları vasitəsilə əldə etdikləri bilik, bacarıq, səriştə və təcrübənin qiymətləndirilməsi və tanınması məqsədilə imtahanın keçirilməsi və onlara peşə ixtisasını təsdiq edən sənədin verilməsi Qaydası” əsasında həyata keçiriləcək.

Proses üzrə müvafiq mexanizm və prosedur qaydaları hazırlandıqdan sonra bu barədə Agentliyin rəsmi internet səhifəsi və sosial şəbəkə hesabı vasitəsilə ictimaiyyətə ətraflı məlumat veriləcək.

Qeyd edək ki, ölkəmizdə ömürboyu təhsilin təmin olunması hədəfinə nail olunması baxımından, vətəndaşların qeyri-formal və informal təhsil formaları vasitəsilə əldə etdikləri kvalifikasiyaların tanınması, başqa sözlə onların malik olduğu bilik, bacarıq, səriştə və təcrübənin müvafiq ixtisas üzrə kvalifikasiya standartlarına uyğunluğunun müəyyənləşdirilməsi və yekunda aidiyyəti təhsil sənədinin verilməsi prosesi xüsusi önəm kəsb edir. Belə ki, bu proses nəticə olaraq özünütəhsil yolu ilə biliklərə yiyələnmiş (informal təhsil) və müxtəlif kurslarda, dərnəklərdə və fərdi məşğələlərdə təlim keçmiş (qeyri-formal təhsil) vətəndaşlarımıza təhsillərini davam etdirmək (peşə təhsili pilləsinin növbəti səviyyəsində) və ya ixtisasları üzrə əmək fəaliyyətinə başlamaq hüququnun verilməsinə xidmət edəcək.

Məqalədə:
Xəbər lenti

Xəbər lenti