Bakı. Trend:
BP-nin Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli ikinci “Yüksəliş” müsabiqəsinin Mentorluq proqramı çərçivəsində müsabiqə qalibləri Azər Əzimov və Fərid İsayevlə görüş keçirib.
Trend xəbər verir ki, görüşdə Azər Əzimov və Fərid İsayevi ikinci “Yüksəliş” müsabiqəsində qaliblər sırasında yer alması münasibətilə təbrik edən Bəxtiyar Aslanbəyli onların praktiki fəaliyyətə cəlb olunmaqla idarəçilik sahəsində təcrübəsinin artırılması üçün zəruri dəstək göstəriləcəyini bildirib. Layihənin idarəçi rəhbərlərindən biri olaraq BP-nin vitse-prezidenti 1 illik fərdi inkişaf planı əsasında müsabiqə qalibləri ilə sıx əməkdaşlıq edəcəyini, onlarla təcrübəsini bölüşəcəyini və beləliklə, potensiallarını üzə çıxarmağa kömək göstərəcəyini qeyd edib.
Bəxtiyar Aslanbəyli vurğulayıb ki, qaliblərin mentorluq proqramını yüksək səviyyədə həyata keçirməsi üçün lazımi şərait yaradılacaq.
İkinci “Yüksəliş” müsabiqəsinin qalibləri isə öz növbələrində Mentorluq proqramı çərçivəsində BP-nin vitse-prezidentinə yaradılan imkana və səmimi qəbula görə təşəkkür edərək onun şəxsi təcrübəsindən faydalanmaq istədiklərini bildiriblər.
Xatırladaq ki, “Yüksəliş” müsabiqəsi Azərbaycan Respublikası
Prezidentinin 26 iyul 2019-cu il tarixində imzaladığı Sərəncamla
təsis olunub. Müsabiqə 21-51 yaş aralığında, ikiillik idarəçilik
təcrübəsi olan, ali təhsilli Azərbaycan Respublikasının
vətəndaşlarını əhatə edir. Müsabiqə 5 mərhələdən – qeydiyyat,
onlayn seçim, əyani, yarımfinal və finaldan ibarətdir. Müsabiqə
qalibləri idarəçi rəhbərlər (https://yukselish.az/mentors.html)
tərəfindən 1 illik fərdi inkişaf planı və hər biri 20 min manat
məbləğində özünüinkişaf qrantı əldə edirlər.
Qeyd edək ki, növbəti, sayca 3-cü “Yüksəliş” müsabiqəsinin
keçirilməsi ilə bağlı Azərbaycan Respublikasının Prezidenti
tərəfindən 20 dekabr 2022-ci il tarixində Sərəncam imzalanıb.
