Bakı. Trend:
WUF13 praktiki fəaliyyət, tərəfdaşlıqlar və investisiyalar vasitəsilə bu öhdəliklərin icrasını sürətləndirmək üçün bir fürsətdir.
Trend xəbər verir ki, bunu BMT-nin Məskunlaşma Proqramının (UN-Habitat) icraçı direktoru Anaklaudia Rossbax Bakıda keçirilən Ümumdünya Şəhərsalma Forumunun 13-cü Sessiyasının (WUF13) açılışında çıxışı zamanı deyib.
Onun sözlərinə görə, iştirakçı ölkələrin bir-birini dinləyib, təcrübələri bölüşmək imkanı var.
"Gələcəyin bizə nə gətirəcəyini bilmirik. Amma bu gün insanların üzləşdiyi reallıqları bilirik: iqlim böhranı, köçkünlük, münaqişələr və dağıntılar. Bu çətinliklər fonunda bir milyarddan çox insan hələ də qeyri-sabit şəraitdə yaşayır; suya, sanitar xidmətlərə, elektrikə, işə və təhsilə etibarlı çıxışları yoxdur. Xəstəliklər yayılır və bundan ən çox uşaqlar əziyyət çəkir.
Bakı bu ilin iyulunda Birləşmiş Millətlər Təşkilatının Baş
Assambleyasının yüksək səviyyəli iclasına aydın bir mesaj
göndərməlidir. Biz mənzil böhranını yalnız etiraf etməkdən çıxaraq,
konkret siyasətlər, investisiyalar və əməli fəaliyyətlər vasitəsilə
Dayanıqlı İnkişaf Məqsədlərinə nail olmağa doğru irəliləməliyik.
Ümid edirəm ki, biz Bakıdan adekvat mənzilin hər kəs üçün, heç bir
istisna olmadan, əlçatan ola biləcəyinə dair yenilənmiş inamla
ayrılacağıq. Bütün regionlarda mənzil siyasətin mərkəzi
prioritetinə çevrilir və bu, iqtisadi artım, sosial inklüzivlik və
iqlim dayanıqlılığı ilə sıx bağlıdır. Afrika üzrə hökumətlər
əlçatan mənzil təminatını, qeyri-formal yaşayış məntəqələrinin
yaxşılaşdırılmasını və infrastruktur investisiyalarını irəli
aparırlar. Asiya və Sakit okean regionunda bir neçə ölkə şəhər
yenilənməsi, əlçatanlıq və genişmiqyaslı mənzil genişləndirilməsi
istiqamətində fəaliyyət göstərir. Latın Amerikası və Karib
hövzəsində isə sosial mənzil və nəqliyyata yönəlmiş şəhərsalma
təşəbbüsləri güclənməkdədir.
Şəhərlərimizin gələcəyi təcrid deyil, inklüzivlik üzərində
qurulmalıdır. İqlim dəyişikliyi proseslerə getdikcə daha çox təsir
edir. Bunu nəzərə alaraq, iqlim fəaliyyəti və mənzil siyasəti artıq
ayrı müzakirələr ola bilməz. Artıq həll yollarına fokuslanmaq
vaxtıdır. Hamı üçün adekvat mənzil təminatına nail olmağın ən yaxşı
yolları hansılardır? Bu sualara cavab tapmaq lazımdır", - o qeyd
edib.
