Azərbaycanda bərk tullantıların istifadəsi üzrə işlərə 2006-cı ildən başlanıla bilər. Bu barədə Trend ə AR ekologiya və təbii sərvətlər naziri Hüseyn Bağırov bildirib.
Onun sözlərinə görə, ilin sonunadək bu istiqamətdə ən münasib variant seçiləcək. "Variantlar arasında elektrik stansiyasının tikintisi də nəzərdən keçirilir. Elektrik stansiyalarında tullantılardan istifadə edərək biz elektrik enerjisi ala bilərik. Biz öz təkliflərimizi hökumətə təqdim etmişik və hazırda bu işlər müzakirə mərhələsindədir"-deyə nazir qeyd edib. Nazirlik tərəfindən bərk tullantıların ləğv edilməsi üzrə strategiya hazırlanır. Bərk tullantılardan səmərəli istifadə oluna biləcək stansiyaların tikintisinə təxminən $100-110 mln.tələb olunur. Bu stansiyanın istehsal gücü 112 MVt. təşkil edə bilər. Elektrik enerjisi istehsalı üçün 20% yanacaq ənənəvi olacaq, qalan hissə isə tullantılar. Elektrik stansiyalarında ildə 250-300 min ton tullantı emal edilə bilər.
