Sentyabrın 22-də AZƏR-ÇEX Cəmiyyəti tərəfindən Praqada Azərbaycan Gecəsi və qalakonsert təşkil olunacaq. Bu barədə Trend ə Azər-Çex Cəmiyyətindən məlumat verilib.
Çexiyada ilk dəfə olaraq, Azərbaycan mədəniyyətinin yüksək səviyyədə təqdim olunması üçün geniş və maraqlı proqram hazırlanıb. Paytaxt Praqa şəhərində keçiriləcək "Azərbaycan Gecəsi" çərçivəsində Azərbaycan haqda sənədli film nümayiş olunacaq. "Azerbaijan...The Eternal Road" filminin rejissoru İqbal Məmmədəliyevdir.
Gecədə Azərbaycan mədəniyyətinin dostlarına "Delphin Caspius" mükafatı təqdim olunacaq. Həmçinin Çexiyada ilk dəfə Azərbaycan sənətçilərinin konserti təşkilş ediləcək. Azərbaycanın əməkdar artisti Tünzalə Ağayevanın canlı konserti olacaq. Konsertdə qonaq qismində isə Çexiyanın məşhur AL-YAMAN qrupu çıxış edəcək.
Bundan başqa milli kulinariyamızın təqdimatı və digər çıxış-prezentasiyalar da nəzərdə tutulub. Tədbirdə Xaricdə Yaşayan Azərbaycanlılarla İş Üzrə Dövlət Komitəsinin sədri Nazim İbrahimovun, Azərbaycan və Çexiyanın dövlət rəsmilərinin iştirakı gözlənilir.
23 sentyabrda isə Tunzalə Ağayeva 6 nəfərlik musiqi qrupunun üzvləri ilə birlikdə Usti nad Labem şəhərindəki beynəlxalq musiqi festifalında çıxış edəcək. Cəmiyyətin Sədri Dr. Elşən S. Nəzərovun şəxsi təşəbbüsü ilə ilk dəfə olaraq proqrama Azərbaycan sənətçilərinin çıxışı salınıb. Beləliklə, 5000 nəfər tamaşaçının iştirakı üçün nəzərdə tutulan Barevna Planeta festifalı şəhərin mərkəzi meydanında keçiriləcək və müxtəlif ölkələrdən olan 30 sənətçi arasında Azərbaycan musiqiçiləri də iştirak edəcək və musiqilərimiz təmsil olunacaq. Festivalda çıxış üçün ən çox vaxt da məhz Azərbaycan sənətçilərinə ayrılıb.
Azər-Çex Cəmiyyətinə tədbirlər planının həyata keçirilməsində Xarici Ölkələrdə Yaşayan Azərbaycanlılarla İş üzrə Dövlət Komitəsi və Azərbaycanın Iyanadakı səfirliyi yaxından kömək göstərir.
