Güney Azərbaycan Öyrənci Hərəkatının çağırışı və təşkilatçılığı ilə İranın bir neçə universitetində kütləvi etiraz aksiyaları keçirilib. Bu barədə Trend ə Güney Azərbaycan Mili Hərəkatını Müdafiə Komitəsindən məlumat verilib.
Qeyd edək ki, hər il Mehr ayının birində (Mehr ayı - sentyabrın 23-dən oktyabrın 22-dək) İranda yeni tədris ili, o cümlədən mədrəsələrdə dərslər başlanılır. Bu il Güney Azərbaycan Öyrənci (Tələbə) Hərəkatı azərbaycanlıların məcburən fars dilində təhsil almasına etiraz olaraq dinc aksiyalar keçirilməsinə çağırışlar edib. İlk dərs günü Təbriz, Urmiyə, Zəncan, Tehran universitetlərində azərbaycanlı tələbələr mitinqlər keçirib, ana dilində təhsil almaq hüquqlarını tələb edib, şüarlar səsləndiriblər.
Müdafiə Komitəsindən bildirilib ki, tələbələrin aksiyaları İranın xüsusi təyinatlı polis qüvvələri tərəfindən yatırılıb. Aksiyaçılar arasında yüngül xəsarətlər alanlar var. Təbriz və Urmiyə universitetlərindəki aksiyalarda 100-dək tələbə həbs olunub. Zəncam Universitetində 10-a yaxın tələbə tutulub. Ümumilikdə bütün həbs olunanlardan bəziləri sonradan sərbəst buraxılıb. Lakin hazırda 100-ə qədər azərbaycanlı tələbənin həbsdə olduğunu bildirilib.
Qeyd edək ki, yeni dərs ilində keçirilən bu etiraz aksiyaları ilə əlaqədar tələbələrdən başqa, Güney Azərbaycan Milli Hərəkatının fəalları da həbs olunmağa başlayıb. Milli hərəkat fəallarından Təbrizde Həsən bəy Ərk Ettelaat məmurları tərəfindən tutulub və naməlum yerə aparılıb. Həmçinin Çingiz bəy Bəxtəvər və mühəndis Qulamrza Əmani də tutulublar.
İranda yaşayan çoxmilyonlu azərbaycanlıların öz ana dilində təhsil ala bilməməsinə etiraz olaraq Azərbaycan Federasiyası-İsveç (AFİ) təşkilatı da bəyanat yayıb. Təşkilat İranda farsların digər millətlərə qarşı yürütdüyü assimilyasiya siyasətini pisləyib və tələbələrin etiraz aksiyalarını dəstəklədiyini bəyan edib.