Azərbaycan, Bakı/ Trend müxbir E.Hüseynli/ Azərbaycan və ABŞ alimləri Qafqazda və Cənubi Xəzərdə geodinamik və deformasiya proseslərini öyrənmək məqsədi ilə yayda qlobal yertəyinetmə sistemi (GPS) quraşdıracaq. Burada Xəzərin Azərbaycan sahillərində tədqiqat məntəqələri təşkil etmək, əldə olunacaq GPS məlumatlarını əvvəlki geoloji və geofiziki məlumatlarla birgə analiz etmək, Ərəbistan və Avrasiya plitələrinin toqquşma zonasındakı deformasiyanın modelini təkmilləşdirmək planlaşdırılıb. AMEA Yer haqqında elmlər bölməsinin akademik-katibi, Geologiya İnstitutunun direktoru, akademik Akif Əlizadənin dediyinə görə, ABŞ və Azərbaycan alimləri Qafqazda yer qabığının deformasiyası ilə əlaqəli tədqiqatları əvvəllər də aparıblar. Bu layihədə isə, Azərbaycan ilk dəfə olaraq ABŞ ilə həmrəhbər kimi iştirak edir. Layihə regiondakı neft və qaz terminallarının, borularının təhlükəsizliyi baxımından mühüm əhəmiyyət kəsb edir. Tədqiqatlar Avrasiya və Ərəbistan plitələrinin qovuşduğu ərazidəki yer qabığında daim baş verən yerdəyişmələrin əsasında aparılacaq və iki mərhələdən ibarət olacaq. Birinci mərhələdə Xəzərin qərb sahilindəki deformasiyalar öyrəniləcək. İkincidə isə, Kiçik Qafqazda və Kür çökəkliyində toplanan geodinamik gərginliyin xarakteri, xüsusilə də hərəkət edən bir plitənin digərinə təsiri barədə dəqiq məlumatlar əldə ediləcək. Bu məlumatların əsasında zəlzələ təhlükələri daha doğru qiymətləndiriləcək.
...