Azərbaycan, Bakı/ Trend , müxbir K. Zərbalıyeva/ Ali Məhkəmə "Yeni Fikir" Gənclər Hərəkatının üzvləri barəsindəki məhkəmə hökmünü qüvvədə saxlayıb. Vəkil Elman Osmanov çərşənbə axşamı Trend ə bildirib ki, Ali Məhkəmədə hakim Hacıbala Sadıqovun sədrliyi ilə keçirilən prosesdə Ramin Tağıyev və Səid Nuriyevin kassasiya şikayətləri təmin olunmayıb.
Vəkil bu işdən İnsan Haqları üzrə Avropa Məhkəməsinə şikayət veriləcəyini deyib.
Ağır Cinayətlərə Dair İşlər üzrə Məhkəmənin hökmü ilə Cinayət Məcəlləsinin 29,278-ci (hakimiyyəti zorla ələ keçirmə və ya onu zorla saxlamaya cəhd) maddəsi ilə təqsirləndirilən "Yeni Fikir" Gənclər Hərəkatının sədri Ruslan Bəşirli 7, onun müavinləri Tağıyev 4 il azadlıqdan məhrumetmə cəzasına məhkum olunub, Nuriyevə isə 5 il şərti iş verilib.
Prezidentin sonuncu əfv fərmanı ilə Nuriyev əfv olunub.
Bəşirlinin kassasiya şikayətinə isə Ali Məhkəmə bu ilin aprelində baxıb və hökmün ona aid hissəsini qüvvədə saxlayıb.