...

Qadın güləşçilər olimpiadaya hazırlaşırlar (FOTO/VİDEO)

İdman Materials 9 İyun 2016 13:18 (UTC +04:00)
Qadın güləşi üzrə yığma komandanın üzvləri Braziliyada keçiriləcək XXXI Yay Olimpiya Oyunlarına hazırlıq planı üzrə növbəti təlim-məşq toplanışı üçün Ukraynaya yollanıb.
Qadın güləşçilər olimpiadaya hazırlaşırlar (FOTO/VİDEO)

Bakı. Trend:

Qadın güləşi üzrə yığma komandanın üzvləri Braziliyada keçiriləcək XXXI Yay Olimpiya Oyunlarına hazırlıq planı üzrə növbəti təlim-məşq toplanışı üçün Ukraynaya yollanıb.

Azərbaycan Güləş Federasiyasından Trend-ə verilən məlumata görə, iyunun 5-dən 17-dək Ukraynanın Konça-Zaspa təlim-məşq bazasında hazırlıq keçən yığmanın heyətində 6 güləşçimiz yer alıb. Toplanışa baş məşqçi Semyon Çterev və böyük məşqçi Nazim Əlicanovun rəhbərliyi altında Mariya Stadnik (48 kq), Anjela Doroqan (53 kq), Nataliya Sinişin, Yuliya Ratkeviç, Alyona Kolesnik (hamısı 58 kq) və Tatyana Omelçenko (60 kq) qatılıblar.

Təlim-məşq toplanışını başa vurduqdan sonra yığmamızın üzvləri Polşanın Spala şəhərində Zialkovski və Petlasinskinin xatirəsinə həsr olunan beynəlxalq turnirdə qüvvələrini sınayacaq.

Bir müddət əvvəl isə qadın güləşçilərimiz Bolqarıstanın Belmeken təlim-məşq bazasında Türkiyə, Belarus, Fransa, Rumıniya və Macarıstan yığmasının üzvləri ilə birgə hazırlıq keçib.

Qeyd edək ki, Rio-de-Janeyroda keçiriləcək XXXI Yay Olimpiya Oyunlarında güləşçilərimiz 14 (sərbəst 6, yunan-Roma 5, qadın 3) idmançı ilə təmsil olunacaq.

Yarışlar 14-21 avqust tarixlərində baş tutacaq.

Məqalədə:
Xəbər lenti

Xəbər lenti