Bakı. Trend:
Bu gün, fevralın 19-da Azərbaycan gimnastı Selcan Mahsudova batut gimnastikası üzrə Dünya Kubokunda qadınlar arasında fərdi proqramın finalında çıxış edəcək.
Trend xəbər verir ki, qadınların fərdi proqramında final yarışları saat 14:20-də başlayacaq. Finalda Selcan Mahsudovanın rəqibləri Braziliya, Qazaxıstan, Fransa, ABŞ və Latviya təmsilçiləri olacaq.
Xatırladaq ki, fevralın 18-də Bakıda keçirilən batut idmanı üzrə Dünya Kubokunun seçmə mərhələsində Selcan Mahsudova 53,370 xal toplayaraq üçüncü yeri tutub.
Qeyd edək ki, fevralın 18-19-da Bakıda Milli Gimnastika Arenasında batut gimnastikası üzrə Dünya Kuboku yarışları keçirilir. Yarışda dünyanın 16 ölkəsindən 60-dan çox gimnast iştirak edir. Gimnastlar fərdi və sinxron proqramlar təqdim edirlər.