Bakı. Trend:
Alman-Azərbaycan Xarici Ticarət Palatası (AHK Azərbaycan) İdarə heyətinin yeni sədri seçilib.
Palatadan Trend-ə verilən məlumata görə, İdarə heyətinin yanvarın 20-də keçirilən görüşündə Falko Haydrix yeni sədr seçilib. O, bu vəzifədə "Siemens AG" şirkətinin Azərbaycandakı nümayəndəliyinin Baş İcraçı Direktoru Dr. Samir Axundovu əvəz edib.
F.Haydrix xüsusilə Azərbaycanda və digər MDB ölkələrində əsasən Korporativ Müştərilər üçün Ticarətin Maliyyələşdirilməsi üzrə layihələrdə təcrübəyə malikdir.
1993-2009-cu illər ərzində F.Haydrix Dresdner Bankında bir çox vəzifədə çalışıb. O, MDB ölkələrində Müştəri Əlaqələrinin İdarə Edilməsi üzrə Maliyyə Müəssisələrində beş illik təcrübəyə sahibdir. F.Haydrix 2003 və 2005-ci illərdə müvafiq olaraq "Dresdner" Bankının Daşkənd və Almatı ofislərinin rəhbəri vəzifəsinə təyin olunub.
İçməli su, tullantı suları və emal olunmuş sular üçün təmizləyici qurğuların dizaynı, inşası və istismarı sahələrində aparıcı podratçılardan olan "PWT Wasser- und Abwassertechnik GmbH" şirkətinin Bakı filialında çalışmazdan əvvəl F.Haydrix Berlinin "Textima GMBH" şirkətinin Bakı ofisində iki il regional menecer vəzifəsini icra edib. 2015-ci ilin mart ayından etibarən F.Haydrix 2007-ci ildən AHK Azərbaycanın ən fəal üzvlərindən biri olan "PWT Wasser- und Abwassertechnik GmbH" şirkətinin Bakıdakı filialının rəhbəridir.