Bakı. Trend:
Çexiya Azərbaycandan qaz tədarükünün artırılması imkanını alqışlayır.
Bu barədə Trend-ə Çexiyanın Xarici İşlər Nazirliyindən bildirilib.
XİN-dən bildirilib ki, Bu gün Aİ Norveç, Əlcəzair, Azərbaycan və Nigeriya kimi müxtəlif enerji təchizatçıları ilə fəal danışıqlar aparır.
"Elə keçən həftə Aİ Enerji Şurası bu məsələdə müəyyən irəliləyiş əldə etdi. Texniki cəhətdən mümkün olarsa, biz Azərbaycandan qaz tədarükünün artırılması imkanını alqışlayırıq", - deyə Nazirlikdən qeyd ediblər.
Qeyd edilib ki, hazırda Azərbaycandan təbii qaz yalnız Aİ-nin cənub ölkələrinə gedir, lakin Aİ mavi yanacaq ehtiyatlarının 40 faizini əvəz etdiyi üçün indi qaz axınını dəyişməyin vaxtıdır.
Nazirliyin məlumatına görə, son iki onillikdə Azərbaycan Çexiyaya ikinci ən böyük neft tədarükçüsü olub.
"Azeri Light CIF nefti Kralupa NEZ-də neft qarışığının əsas tərkib hissəsidir", - deyə XİN-dən bildirilib.
Nazirlikdən qeyd ediblər ki, Çexiya enerji sektorunda əməkdaşlıqla yanaşı, mədəniyyət, təhsil, turizm, tibb və ətraf mühit də daxil olmaqla bir çox sahələrdə Azərbaycanla əməkdaşlığı inkişaf etdirmək istərdi.