Bakı. Trend:
2023-cü ildə Sumqayıt Kimya Sənaye Parkında dörd müəssisənin istehsal fəaliyyətinə başlaması planlaşdırılır.
Trend-in məlumatına görə, bu barədə bu gün İqtisadi Zonaların İnkişafı Agentliyinin idarə heyətinin sədri Elşad Nuriyev 2022-ci ilin yekunlarına həsr olunmuş mətbuat konfransında deyib.
Onun sözlərinə görə, bunlar "Azərbaycan Vanhong Ceramics Co" MMC-nin (Çin kapitallı şirkət) keramik plitələr istehsalı müəssisəsi, "AK Pack" MMC-nin yumşaq polimer qablaşdırma məhsulları istehsalı müəssisəsi, "Novus Plastica" MMC-nin polimer məhsullar emalı müəssisəsi və "UPI - Universal Packing İndustry" QSC-nin qablaşdırma məhsulları istehsalı müəssisəsidir.
"Bu müəssisələrdə ümumilikdə 90 milyon manatdan artıq həcmdə investisiya ilə 600-dən çox daimi iş yerinin yaradılması planlaşdırılır", - o deyib.
Xatırladaq ki, 2022-ci ildə 28 sahibkarlıq subyekti sənaye zonalarında rezident statusu alıb (bunlardan ikisi Sumqayıt Kimya Sənaye Parkının rezidenti statusunu alıb), ümumilikdə bu günədək 116 sahibkarlıq subyekti rezident statusu alıb.