Bakı. Trend:
Rusiyanın Tomsk vilayətindən olan biznes-missiyaların Azərbaycana səfəri başlayıb.
Bu barədə Trend-ə Rusiya Ticarət Nümayəndəliyindən məlumat verilib.
Missiyanın tərkibinə insan bədəninin real yenilənə bilən biotibbi trenajor-simulyatorlarının hazırlanması, bio-dondurulmuş məhsullar, probiotiklər və ağac materiallarından alınmış ekstraktlara əsaslanan bioloji aktiv əlavələrin (BAƏ) istehsalı ilə məşğul olan şirkətlər daxildir.
Tomsk vilayətinin ixraca dəstək mərkəzinin rəhbəri Aleksandr Belyayev Trend-ə bildirib ki, Tomsk vilayəti uzun müddətdir ki, Azərbaycanla məhsuldar əməkdaşlıq edir.
"Bizim universitetlər və müəssisələr əməkdaşlığın inkişafında maraqlıdırlar. Bu il kiçik və orta müəssisələrin tələbi əsasında biz Bakıda biznes-missiyalar təşkil etdik. Ümid edirik ki, şirkətlərimiz arasında aparılan danışıqlar qarşılıqlı və faydalı əlaqələr və müqavilələr ilə nəticələnəcək. Bu əməkdaşlığın davam edəcəyinə ümid edirik və gələn il də Tomsk vilayəti ilə Azərbaycan arasında əməkdaşlığın inkişafına dair tədbirlər təşkil etməyi planlaşdırırıq", - o əlavə edib.
Qeyd edək ki, biznes-missiyaların səfəri 2 noyabra qədər davam edəcək.