Bakı. Trend:
Rusiya neft məhsullarının Mərkəzi Asiya ölkələrinə ixraci sabit olaraq yüksək səviyyədə qalmaqdadır.
Trend xəbər verir ki, bu barədə "Energo Trade" şirkətinin Mərkəzi Asiya və Qafqaz üzrə baş tərəfdaşı Pərviz Məmmədov Bakıda keçirilən "Xəzər və Mərkəzi Asiya Neft Ticarəti və Nəqliyyatı" Forumu çərçivəsində çıxışında bildirib.
Onun sözlərinə görə, Rusiya neft məhsullarının region üzrə ixrac həcmləri sabit olaraq qalmaqdadır – 2022-ci ildən başlayaraq təxminən illik 6 milyon ton.
P. Məmmədov qeyd edib ki, idxalın ən böyük artımı Özbəkistanda qeydə alınıb – 2021-ci illə müqayisədə demək olar ki, iki dəfə çox olub. Qazaxıstan da alışları artırıb, Qırğızıstan isə sabit idxal səviyyəsini qoruyub saxlayır ki, bu da ölkənin Avrasiya İqtisadi İttifaqının üzvü olması ilə bağlıdır.
“2023 və 2024-cü illər dayanıqlı dinamika nümayiş etdirməkdədir: hər il təqribən altı milyon ton Rusiya neft məhsulları Mərkəzi Asiya bazarlarına tədarük olunur”,- deyə o vurğulayıb.
Onun sözlərinə görə, Qazaxıstan özünün əhəmiyyətli neft məhsulları istehsalı həcminə görə regionun yeganə ölkəsi olaraq qalmaqdadır.
P. Məmmədov Qazaxıstanda tibbi məhsulların istehsalının artmasına da xüsusi diqqət çəkib – ölkə bu sahədə 2024-cü ildə rekord göstəricilərə çatıb.
O, həmçinin yanacaq istehsalı strukturundakı dəyişikliklərə toxunub:
“Məlum olduğu kimi, Atırau Neft Emalı Zavodunun modernizasiyası həyata keçirilib və bu, aviasiya kerosininin istehsalının artırılmasına yönəlib. Nəticədə mazut və vakuum qazoyl istehsalı azalıb, çünki neftin emalı daha dərin və səmərəli həyata keçirilir. Biz artıq duru neft məhsullarının istehsalında dayanıqlı artım müşahidə edirik”.