Azərbaycan, Bakı/ Trend , müxbir Ü.İsmayılova/ Azərbaycan hökuməti 2008-ci ildə yaşayış minimumunu 70 manata qədər artırmaq niyyətindədir. Bunu cümə axşamı Milli Məclisin Sosial siyasət komissiyasının sədri Hadı Rəcəbli bildirib.
Yaşayış minimumu - insanın sağlamlığı və həyat fəaliyyətinin təminatı üçün lazım olan minimum qida və qeyri-ərzaq məhsulları və xidmətlərin, həmçinin, icbari ödəniş və rüsumların da daxil olduğu istehlak zənbilinin dəyəridir.
"Azərbaycan hökumətinin məqsədi - yaşayış minimumunun 2008-ci ildə 80-90 manata çatdırılması planlaşdırılan minimum əmək haqqı məbləğinə çatdırmaqdır",-deyə deputat bildirib.
Minimum əmək haqqı hazırda 50 manat məbləğində müəyyən olunub.
Azərbaycanın Nazirlər Kabineti tərəfindən cari ilin ikinci yarısı üçün yaşayış minimumu 64 manat məbləğində müəyyən olunub.
Azərbaycan Həmkarlar İttifaqları Konfederasiyasının məlumatına əsasən, iyulun əvvəlində bir nəfər üçün istehlak zənbilinin dəyəri 96 manat, əmək qabiliyyətli şəxslər üçün isə, 107 manat təşkil edib.
