Azərbaycan, Bakı / Trend , müxbir İ.Xəlilova / Kənd Təsərrüfatı Nazirliyinin kənd təsərrüfatı kreditləri üzrə Dövlət Agentliyinin Baş direktoru Razim Vəliyevin verdiyi məlumata görə, Dünya Bankı Azərbaycan hökumətinə 58 mln. dollar məbləğində qiymətləndirilən kənd təsərrüfatının inkişafı və kreditləşməsi proqramının ikinci mərhələsi çərçivəsində, maliyyələşmə prosesinə başlanması xahişi ilə müraciət edib. Bu layihənin reallaşmasına 2007-ci ilin əvvəlində başlanıb.
"Dünya Bankı hesab edir ki, bu, birinci layihələrdir, bu səbəbdən də, ilkin mərhələdə ekspertizanı özü aparmaq və Azərbaycanda biznes-planın hazırlanması üçün potensialın olmasına əmin olmaq qərarına gəlib" - deyə Vəliyev bildirib.
Vəliyevin sözlərinə görə, kreditlər kredit ittifaqları və səlahiyyətli banklar vasitəsilə ayrılacaq. Bu banklara "TexnikaBank", "TuranBank" və "MuganBank" daxildir. Layihənin birinci mərhələsi çərçivəsində, 30 kredit ittifaqı, ikinci mərhələsi çərçivəsində isə, əlavə 20 ittifaq yaradılacaq.
Layihədə kredit komponenti 15 mln. dollar təşkil edir ki, bu məbləğin 9,7 mln. dolları mikrokreditləşməyə yönəldiləcək, qalan hissəsi isə, kommersiya şərtləri ilə bank-agentlər tərəfindən ayrılacaq. Mikrokreditlər bir il müddətinə girov olmadan veriləcəyindən, faiz dərəcələri 20-25% arasında müəyyən olunacaq. Mikrokreditin maksimum həddi min dollar təşkil edir.
Banklar vasitəsilə kreditlər 19-20% dərəcəsi ilə ayrılacaq. Bu kreditlərin maksimum müddəti 5 il, bir layihə üçün həcmi 300 min manatdır.
Vəliyevin sözlərinə görə, layihə çərçivəsində regional məsləhət mərkəzlərinin sayını 5-dən 10-a qədər artırmaq nəzərdə tutulur.
Layihənin ümumi dəyəri 58 mln. dollar təşkil edir, Dünya Bankının kreditinin payına 28,5 mln. dollar düşür. Layihənin qalan hissəsi yapon qrantı (1,6 mln. dollar), revolver fondun (9,6 mln. dollar) hesabına maliyyələşdiriləcək. Hökumətin payı isə, 7,8 mln. dollardır.
Layihə iki komponentdən ibarətdir. Birinci komponentin dəyəri 42 mln. dollar təşkil edir və kənd təsərrüfatında biznes-xidmətlərin dəstəklənməsi üçün nəzərdə tutulub. Birinci komponent çərçivəsində, ölkənin regionlarında maliyyə xidmətlərinin gücləndirilməsi nəzərdə tutulur. Yerli bankların potensialının artırılması da nəzərdə tutulur.
14 mln. məbləğində ikinci komponent kənd təsərrüfatı istehsalının artırılması, məsləhət xidmətlərinin genişləndirilməsi, baytarlıq xidmətlərinin istifadə imkanlarının gücləndirilməsi, yeni kənd təsərrüfatı texnologiyasının tətbiqini nəzərdə tutur.
Layihə dörd illik müddətə nəzərdə tutulub.
