Azərbaycan, Bakı / Trend müxbir Ü.İsmayılova/ "Əmlak bazarının iştirakçıları" ictimai birliyinin çərşənbə axşamı yaydığı məlumatda bildirilir ki, noyabr ayında Bakının daşınmaz əmlakın təkrar bazarında yaşayış sahəsinin bir kvadrat metrinin orta qiyməti 1515 ABŞ dolları təşkil edib.
Bu ay ərzində bazarda orta qiymətdən aşağı təklif olunan mənzillərin payı 3,5%, bahalı mənzillərin payı isə 6,1% təşkil edib.
Noyabr ayında qiymətlərin əhəmiyyətli dərəcədə artımı şəhərin 3-cü və 4-cü zonalarında, nisbi sabitlik isə Bakının 1-ci və 2-ci zonalarında müşahidə olunur.
Monitorinqin yekunlarına görə, layihələr üzrə əsasən "italyanka", "xüsusi" layihəli mənzillərin və təkrar "yeni tikililər"in qiymətlərində azalma müşahidə edilib.
Təkrar bazarın təklif portfelində "yeni tikililər"in payı 13.6 faizə, "Leninqrad" layihəli mənzillərin payı 28.2 faizə bərabər olub.
Mənzillərin şəhər üzrə orta qiymətləri 0.3% artaraq 102032 ABŞ dolları, orta sahəsi isə azalaraq 69.9 kv.m və otaq sayı isə 2.58-a bərabər olub.
