Azərbaycan, Bakı/ Trend , müxbir İ.Xəlilova/ "Azərsu" Səhmdar Cəmiyyəti Azərbaycanda istehlak olunan suya görə yığımın tədricən artmasını gözləyir. Bu göstərici son 10 ayda 60 faizə çatıb. Bu barədə çərşənbə axşamı SC-nin sədri Nizaməddin Rzayev məlumat verib. "Yığım planının artırılması üçün işləmək lazımdır və biz düşünürük ki, 2008-ci ildə yığım səviyyəsi təxminən 80-90 faizə çatdırılacaq" - Rzayev bildirib. Bunun üçün su sayğaclarının quraşdırılmasını genişləndirmək lazımdır. "Azərsu" rəhbərinin sözlərinə görə, bu gün abonentlərin 30 faizində su sayğacları quraşdırılıb, lakin 2008-ci ilədək Bakıda onların quraşdırılmasını başa çatdırmaq planlaşdırılır. SC-nin 893 min ,o cümlədən əhali arasında 877 min abonenti var. Bakı üzrə "Azərsu" 441 min abonentə malikdir. Bunun 430 mini əhalinin payına düşür. Hündürmərtəbəli binalarda sayğaclar pulsuz, dövlət büdcəsindən ayrılan vəsait hesabına quraşdırılır. Şəxsi evlərdə -bağ evlərində və villalarda sayğaclar, qanunvericiliyə uyğun olaraq, abonentlərin öz hesablarına quraşdırılır. Bu tələb yerinə yetirilmədiyi təqdirdə, su verilməsi dayandırılır.
...
