Azərbaycan, Bakı, 16 yanvar/ Trend , müxbir İ.Xəlilova/ 2007-ci ilin yekunlarına görə, Azərbaycanın Vergilər Nazirliyi nəzdində fəaliyyət göstərən Xüsusi Rejimli Vergi Xidməti Departamentində (əvvəllər xüsusi vergi rejimli iri vergi ödəyiciləri və müəssisələrlə iş üzrə Departament) xidmət göstərilən vergi ödəyicilərinin siyasına yenidən baxılıb və iri vergi ödəyicilərinin sayı 600-ə çatıb. Bu barədə departament rəhbəri Sahir Məmmədxanov məlumat verib.
Bu il departamentin uçotuna 37 vergiödəyici daxil olub, 18 müəssisənin və təşkilatın qeydiyyatı ləğv edilib. Məmmədxanovun sözlərinə görə, bu PSA tipli müqavilər çərçivəsində müqavilələrin başa çatması ilə əlaqədar daim dəyişən sistemdir.
"Müqavilələr çərçivəsində fəaliyyət göstərən əcnəbi şirkətlər Azərbaycana gəlirlər və müqavilələrin başa çatması ilə ölkəni tərk edirlər" - departament rəhbəri bildirib.
Departamentdə dövlət mülkiyyətində olan 210 müəssisəyə, xüsusi rejimli 250 müəssisəyə xidmət göstərilir. Qalanları isə sənaye, tikinti müəssisələri və xarici diplomatik nümayəndəliklərdir.
İri vergi ödəyicilərinin siyahısı hər il Nazirlər Kabineti tərəfindən qoyulan meyarlara uyğun yenilənir. Bu meyarların təsiri altına düşməyənlər yerli vergi orqanlarının uçotuna keçirlər. Lakin paralel olaraq, iri vergi ödəyicilərinin sırası yenilərin hesabına artır.
Ötən il, həmçinin, Departamentdə Bakı metropoliteninin 14-15 strukturu uçota götürülüb. Neft müqavilələri çərçivəsində işləyən şirkətlər meyarlara cavab verməsələr belə, avtomatik olaraq iri vergi ödəyiciləri üzrə Departamentin uçotuna dayanırlar.
Nazirlər Kabinetinin qaydalarına müvafiq olaraq, bu departamentdə uçotda dayanan vergi ödəyicilərinin siyahısı, meyarlara uyğun olmaqla, mayın 15-dək dəqiqləşdirilməlidir.
