Azərbaycan, Bakı, 30 yanvar/ Trend , müxbir Ü.İsmayılova/ Azərbaycan üçün Cekson-Venik düzəlişinin ləğvi gələcəkdə ölkəyə ABŞ-la ticarət-iqtisadi münasibətlərini genişləndirməyə imkan verəcək yaxşı siyasi addımdır. Bu barədə çərşənbə günü Azərbaycan Nazirlər Kabinetinin iqtisadiyyat və maliyyə-kredit siyasəti şöbəsinin keçmiş rəhbəri Oqtay Haqverdiyev bildirib.
Hazırda Azərbayan və ABŞ arasında ticarətin xüsusi çəkisi cəmi bir faiz təşkil edir. Belə ki, ölkənin neft və qazı, əsasən, Avropaya ixrac olunur.
ABŞ Senatına ilk dəfə 1974-cü ildə tətbiq edilən və mühacirət azadlığının təmin edilməsi ilə ABŞ və SSRİ arasında normal ticarət münasibətlərinin qurulmasını tələb edən Cekson-Venik düzəlişinin ləğvi haqqında qanun layihəsi çıxarılıb.
İqtisadi siyasət üzrə parlament komissiyasının üzvü Əli Məsimov hesab edir ki, Azərbaycan qlobal enerji təhlükəsizliyi nöqteyi-nəzərdən çıxış etdiyi halda, onun hər hansı bir ölkə ilə ticarətinə qadağa qoyulması ədalətsiz və əsassızdır.
Deputatın rəyinə görə, qanun layihəsi hələ də qüvvədə olsa da, Azərbaycan və ABŞ arasında ticarət münasibətləri bütün mümkün sahələrdə inkişaf edir. "Düzəlişin ləğvi Azərbaycan və ABŞ arasında ticarət münasibətlərinə əlavə təkan verəcək", - deputat bildirib.
