Azərbaycan, Naxçıvan, 05 fevral / Trend , müxbir E.Məmmədov/ Naxçıvan şəhərində taksi dayanacaqları üçün yerlərin müəyyənləşdirilməsinə başlanılıb. Bu barədə çərşənbə axşamı Trend in bölgə müxbirinə Naxçıvan şəhər İcra Hakimiyyətindən bildiriblər.
Naxçıvan şəhərində 300-yə yaxın taksi fəalliyyət göstərir.
Tətbiq olunan yeni qaydalara görə, Naxçıvan şəhərində fəaliyyət göstərən taksilər ancaq icra hakimiyyəti tərəfindən müəyyənləşdirilmiş yerlərdə dayana biləcəklər. Hələlik taksi dayanacağı kimi 12 yer müəyyənləşdirilib. Bu sayın 20-yə çatdırılacağı gözlənilir.
Taksi dayanacaqlarının muxtar respublikanın rayon mərkəzlərində də yaradılacağı bildirilir. Sədərək, Şahbuz, Babək, Kəngərli rayonlarında 2, Culfa, Ordubad, Şərur rayonlarında isə 4-5 taksi dayanacağının olacağı nəzərdə tutulur.
Taksilər martın ortalarından müəyyən olunmuş yeni dayanacaqlarla təmin olunacaq.
