Azərbaycan, Bakı, 12 fevral / Trend , müxbir S.Babayeva/ Oğuz-Qəbələ-Bakı su kəmərinin 2008-ci ilin sonunadək istismara verilməsi planlaşdırılır. Hazırda qrafik üzrə ciddi iş gedir. Bu barədə çərşənbə axşamı "Azersu" ASC-nin rəhbəri Nizaməddin Rzayev məlumat verib. Layihənin sifarişçisi "Azersu" ASC-dir.
"Hazırda layihə çərçivəsində, yollar çəkilir, çay keçidlərində işlər aparılır" - deyə o bildirib.
Su kəməri tikintisinə 2007-ci il martın 1-dən başlanılıb.
"Azersu" ASC Oğuz-Qəbələ-Bakı su kəmərinin layihələndirilməsi və tikilməsi üçün "Turan Hazinedaroglu/Tekser Inshaat Sanayi/Gence Korpu Tikinti 2" Alyansı ilə müqavilə imzalayıb.
Layihənin ümumi dəyəri 2006-cı ildə 480 mln. manat qiymətləndirilib. 2007-ci ildə Azərbaycan Dövlət Neft Şirkətinin (ARDNŞ) büdcəsindən layihəyə 183,62 mln. manat ayrıılıb. Tikinti işləri 142,1 mln. dollar dəyərində, həyata keçirilmə müddəti 14 ay qiymətləndirilir.
Layihənin reallaşdırılmasına 2006-cı ildə 82,7 mln. manat sərf olunub, o cümlədən 2,4 mln. manat "CES Consulting Engineers" Şirkətinin Texniki İqtisadi Əsaslandırma və ilkin layihələndirmə sənədlərini hazırlamasına, 2006-cı ilin dekabrında isə, 82,3 mln. manat "Azkompozit"ə ayrılıb.
Bu zonada yeraltı istismar ehtiyatları sutkada 15 kub metrdən artıq təşkil edir.
Suyun keyfiyyəti yüksəkdir və dünya standartlarına cavab verir. Su kəməri marşrutu Çarxana-Göyçay-Ağsu-Udulu ərazisi üzrə Oğuz-Qəbələ su anbarından keçəcək.Kəmərin ümumi uzunluğu 260 km-dən çoxdur.
