Azərbaycan, Bakı, 12 mart / Trend , müxbir Ü.İsmayılova / Azərbaycanın Əmək və Əhalinin Sosial Müdafiəsi Nazirliyi nəzdində Əmək Müfəttişliyi işə götürən sahibkarların təhlükəsiz əmək təmin etmək cəhdlərini və tikinti işlərinin gedişatında düzgün əmək müqavilələrinin sayının artmasını qeyd edir.
"Vəziyyətin yaxşılaşmasının faizlərlə dəqiq fərqini deməyə çətinlik çəkirəm. Bu, rübün yekunlarından sonra məlum olacaq" - deyə çərşənbə günü Azərbaycanın Əmək Müfəttişliyinin rəhbəri Nəbi Şükürlü bildirib.
Müfəttişlik tikinti obyektlərinin aktiv yoxlamalarını 2007-ci ilin avqustunda Bakının mərkəzi küçələrindən birində tikilən 16 mərtəbəli binanın uçması və 25 nəfərin həlak olması faktından sonra başlayıb. Əmək Müfəttişliyi tikinti işlərində normal əmək şəraitinin, işçilərin texniki təhlükəsizliyinin təminatı, eləcə də əmək müqavilələrinin bağlanması yönümündə müntəzəm monitorinqlər keçirir.
Yoxlamalar zamanı fəhlələrin texniki təhlükəsizliyinin qorunmaması faktları aşkar olunub. Məsələn, yüksək mərtəbəli binalar tikən fəhlələr kaska, təhlükəsizlik kəməri və xüsusi ayaqqabılarla təmin edilməyib. Yoxlamalar əmək müqaviləsinin ya heç olmaması, ya da aylıq əmək haqlarının düzgün göstərilməməsi faktlarını da aşkar edib.
Əksər hallarda əmək müqavilələrində əmək haqları minimal əmək haqları həcmində göstərilib.Tikinti sektorunda əmək haqları, orta hesabla, 250-300 manat olsa da, 60 manat göstərilib.
" Müfəttişliyin bir çox iş görməsinə, yəni təhlükəsiz əməyin təminatı üzrə tədbirlərin keçirilməsi, tikinti obyektlərinin işinin dayandırılması, qanunu pozanların cərimələnmasinə baxmayaraq, çatışmazlıqlar hələ də mövcuddur" - deyə Şükürlü bildirib.
Müfəttişliyin monitorinqlərinin yekunlarına əsasən, 2007-ci ildə tikinti sektorunda 70 nəfərdən çox insan həlak olub.
Müəlliflə əlaqə ünvanı: [email protected]
