Azərbaycan, Bakı, 18 aprel / Trend , müxbir A.Bədəlova/ Maliyyə bazarlarının zəif, avronun isə güclü aktivliyi bu il Avrozonada inflyasiyanın enməsinə kömək edəcək. Britaniyanın iqtisadi araşdırmalar üzrə konsaltinq şirkəti "Capital Economics"in Avropa üzrə iqtisadçısı Ben Mey (Ben May) belə hesab edir.
" Neftin və yeyinti məhsullarının kəskin artımı olmasa, 2009-cü ilin əvvəlində Avrozonada inflyasiya iki faiz azalacaq", - deyə cümə günü Mey Trend a bildirib.
Britaniya ekspertinin sözlərinə görə, istehlak qiymətlərinin mart indeksi Avropa Mərkəzi Bankının (AMB) Avrozona iqtisadiyyatında inflyasiya təzyiqləri ilə bağlı narahatçılığını zəiflədə bilməz.
"Martda inflyasiyanın səviyyəsi 3,5 faizdən 3,6 faizədək artıb, enerji daşıyıcıları və yeyinti məhsullarının illik inflyasiya artımı müşahidə olunub. Lakin baza inflyasiyası 1,8 faizdən 2 faizə qədər artıb. Bu da 2003-cü ilin aprelindən bəri ən yüksək səviyyə hesab olunur", - deyə Mey bildirib.
"Avrostat" Statistika Agentliyinin məlumatına görə, Avrozonada inflyasiya mart ayında rekord həddə çatıb. İllik göstərici 3,6 faiz artıb ki, bu da son16 il ərzində ən yüksək səviyyədir.
Avrozonada martda yeyinti məhsullarının inflyasiyası fevral ayının 5,8 faizi ilə müqayisədə 6,2 faiz təşkil edib. Keçən ay enerji daşıyıcılarının inflyasiyası fevral ayının 10,4 faizinə nisbətdə 11,2 faiz artıb.
AMB-nin məqsədi inflyasiyanı 2 faizdən bir az artıq səviyyədə saxlamaqdır.
Müəlliflə əlaqə saxlamaq üçün elektron ünvan: [email protected]
