Azərbaycan, Bakı, 26 aprel/ Trend müxbir İ.Xəlilova/ Azərbaycanın Nəqliyyat Nazirliyində Bakıdan Sumqayıtadək yerüstü sürətli metronun tikintisi imkanları nəzərdən keçirilir. Bu barədə nazirlikdən məlumat veriblər. Bununla əlaqədar olaraq, araşdırmaların aparılması üçün Nəqliyyat Nazirliyində işçi qrupu yaradılıb.
Bu təklif Azərbaycana Koreya tərəfdən gəlib. Variantlardan biri xəttin Biləcəridən tikilməsidir.
Koreya dəmir yolu artıq Azərbaycana ölkə ərazisində Bakıdan Gürcüstan sərhədinədək 503 km uzunluğunda dəmir yolunda sürətli qatarın buraxılması layihəsini təklif edib. Tədqiqatlar bu layihəyə 2010-cu ildən sonra başlamağın məqsədəuyğun olduğunu göstərir. Layihə yeddi il ərzində reallaşdırılacaq (iki il layihələndirmə, beş il tikinti). Gələcəkdə Rusiya sərhədi istiqamətində analoji layihənin reallaşdırılması mümkündür. Layihəni dövlət, özəl banklar və şirkətlərin qarışıq investisiyaları hesabına reallaşdırmaq nəzərdə tutulur. Layihənin reallaşdırılması ekologiya və yanacağın qənaətinə müsbət təsir göstərəcək.
Koreya mütəxəssislərinin məlumatına görə, hazırda yol örtüyünün, lokomotiv və vaqon parkının, siqnal və rabitə sisteminin köhnəlməsinə görə, Azərbaycanın dəmir yolunda sürət saatda 80 km ötmür.
Koreya mütəxəssisləri tərəfindən layihənin üç reallaşdırılma variantı təklif edilib: mövcud vəziyyətdə dəyişikliklər və hərəkətin saatda 100 km-dək sürətləndirilməsi, hərəkət sürətinin saatda 150 km-dək sürətləndirilməsi və hərəkət sürətinin saatda 160 km-dək sürətləndirilməsi.
Birinci variant $2,7 mlrd. məbləğində sərmayənin yatırılmasını nəzərdə tutur. İkinci halda (daha məqbul hesab edilir) $3,5 mlrd. həcmində sərmayə nəzərdə tutulur. Üçüncü layihə - hərəkət sürətinin saatda 160 km-dək artırılması ikincidən az fərqlənir, sərmayələrin həcmi isə $4,3 mlrd. təşkil edəcək.
$3,5 mlrd məbləğində ikinci variantının ilkin dəyərinə əsasən:
- $177 mln. - yol örtüyünün yenidənqurmasına xərcləmək nəzərdə tutulur,
- $441 mln. - 428 km uzunluğunda yolun yenidənqurması (hər kilometrə $1,031 mln.),
- $317 mln. - 503 km uzunluğunda elektrik sisteminin ( hər kilometrə $0,631 mln.),
- $370 mln. - 503 km uzunluğunda siqnal sisteminin (hər kilometrə $0,736 mln.),
- $396 mln. - 503 km uzunluğunda informasiya və rabitə sisteminin (hər kilometrə $0,789 mln.),
- $810 mln. - 503 km uzunluğunda asılı xətlərin (hər kilometrə $1,610 mln.).
Birbaşa xərclər $2,511 mlrd. , qabaqcadan nəzərdə tutulmayan xərclər $251 mln. , məsləhət xidmətləri $251 mln. qiymətləndirilir. Layihənin ümumi dəyəri (ƏDV-siz) $3,013 mlrd., 18 faiz ƏDV ilə birlikdə $3,555 mlrd. təşkil edir.
Aprelin 26-a olan rəsmi məzənnə - 0,8289 AZN/USD.
Müəlliflə əlaqə saxlamaq üçün elektron ünvan: [email protected]
