Azərbaycan, Bakı, 14 may/ Trend , müxbir İ.Xəlilova/ "AGBank"ın səhmdarları "AG Leasing" lizinq şirkətinin kapitalında bankın iştirak payının 5 faiz artırılması barədə qərar qəbul ediblər. Bu barədə çərşənbə günü bankda PR-şöbənin rəhbəri Ələkbər Əliyev məlumat verib. Nəticədə "AGBank"ın səhmdar payı 35 faizədək artıb.
Lizinq şirkətində səhmlərinin bir hissəsini İngiltərənin 15 faiz iştirak payına malik "Milio Leasing Limited" şirkəti güzəştə gedib. Səhmlərin yenidən paylaşdırılması nəticəsində "AG Leasing" şikrətinin bütün təsisçilərinin pay nisbəti aşağıdakı kimidir: "AGBank" - 35 faiz, İngiltərənin "Hiperion Capital Management" şirkəti - 30 faiz, Amerikanın "Delta Trans LLC" şirkəti - 25 faiz, "Milio Leasing Limited" - 10 faiz.
Əliyevin sözlərinə görə, 5 faiz səhmin nominal dəyərinin 50 min manat olmasına baxmayaraq, saziş 66 667 manata həyata keçirilib.
Lizinq şirkətinin əvvəlki bəyanatlarına görə, "AG Leasing" Azərbaycan şirkətinə böyük maraq göstərən strateji investorları səhmdarlığa cəlb etməyi planlaşdırır. Strateji investorların səhmdarlığa daxil olması əlavə səhm emissiyası hesabına mümkündür. Belə ki, "AG Leasing"in səhmdarları özlərinin iştirak paylarını satmaqda maraqlı deyillər.
Şirkət həmçinin beynəlxalq maliyyə təşkilatlarından kredit xətlərinin cəlb edilməsi ilə əməliyyatların həcminin genişləndirilməsi üzrə danışıqlar aparır. Danışıqlar Beynəlxalq Maliyyə Korporasiyası, Avropa Yenidənqurma və İnkişaf Bankı, Asiya İnkişaf Bankı ilə aparılır.
"AG Leasing" hələ 2006-cı ildə BMK-dan $3 mln. həcmində kredit almağı planlaşdırıb. Lakin korporasiya birbaşa olaraq vəsait ayırmaqdan imtina edib və bu vəsaitləri şirkətin əsas təsisçisi olan "AGBank"a təqdim edib. Normativ tələbləri nəzərə alaraq, lizinq şirkəti bu kredit ehtiyatından istifadə edə bilməyib. Belə ki, bank özünün törəmə şirkətinə kapitalın 10 faizinədək vəsait verə bilər.
"AGLeasing" ötən il beynəlxalq audit keçdiyi üçün hazırda kredit ehtiyatlarının birbaşa cəlb edilməsinə ümid edir.
"AGLeasing" 2005-ci ildə təsis edilib. "AGLeasing" universal lizinq şirkəti kimi fəaliyyət göstərir və əsas diqqəti geniş avadanlıq spektrinə yönəldir. Lakin şirkət hələ ki, "Aqrolizinq" dövlət şirkəti ilə rəqabət apara bilməz. Bu, "Aqrolizinq"in dövlət maliyyələşdirməsi altında təklif etdiyi şərtlərlə bağlıdır.
"AGLeasing"də maksimal həcm hər layihə üzrə $500 mindən çox deyil. Müddət beş ilədək, avans ödəmənin dərəcəsi isə 20 faizdən çoxdur. İllik faiz dərəcələri 22-24 faiz arasında dəyişir.
Mayın 14-nə olan rəsmi məzənnə - 0,8276 AZN/USD
Müəlliflə əlaqə saxlamaq üçün elektron ünvan: [email protected]
