Azərbaycan, Bakı, 15 may / Trend müxbir İ.Xəlilova/ Azərbaycanın 10 şəhərində su təchizatı və kanalizasiya sisteminin təkmilləşdirilməsinə dair sazişin şərtlərinin dəyişdirilməsindən imtina, Yaponiyanın Beynəlxalq Əməkdaşlıq Bankının (JBİC) 32 mlrd. yendən (təqribən $300 mln.) çox məbləğdə krediti üzrə danışıqları dayandıra bilər. Bu barədə cümə axşamı ölkə hökumətindən məlumat veriblər. Yapon bankı layihə çərçivəsində tədarükləri və işləri vergidən azad etməyi təklif edir.
Bu şərt danışıqlarda problemlər yaradıb və Azərbaycanın Maliyyə Nazirliyi bankı bu şərtin götürülməsi haqqında məlumatlandırıb. Belə ki, bu şərt milli qanunvericiliyə ziddir. [2008-ci ildən etibarən beynəlxalq kreditlər çərçivəsində həyata keçirilən bütün işlər, xidmətlər və mallar ƏDV-nin ödənilməsinə cəlb edilib].
Kredit sazişində dair JBİC ilə danışıqlar bankın missiyasının mayın 22-də Bakıya səfəri zamanı davam etdiriləcək.
Yapon bankı krediti üç şərt əsasında ayırmağa hazırdır. Layihənin su təhcizatı sisteminin bərpasına yönələn hissəsi illik 1,3 faiz (kreditin yenlə ifadə olunduğu nəzərə alınmaqla), kanalizasiya - 0,4 faiz, məsləhət xidmətləri və treninqlər isə illik 0,1 faiz dərəcə üzrə maliyyələşdiriləcək. Ümumilikdə vəsaitlər 10 il güzəştli dövr olmaqla 40 il müddətinə təklif edilib. Hökumət danışıqlar zamanı layihənin su hissəsi üçün kredit dərəcəsini yumşaltmağı xahiş etmək niyyətindədir. Belə ki, bu vəsaitlər dollar ekvivalentində ölkəyə illik 7-8 faizə başa gələcək.
Layihənin texniki-iqtisadi əsaslandırılması Tokio Engineering/ASP konsorsiumu tərəfindən altı şəhər üzrə - Şamaxı, Salyan, Neftçala, Bərdə, Quba və Əli Bayramlı (hazırki Şirvan) şəhərləri üzrə hazırlanıb. Lakin bank layihəni 10-dək genişləndirməyə razılaşıb.
Su təchizatı sisteminin təkmilləşdirilməsi suburaxıcının tikintisini, təmizlənməi, şəhərədək nəqletməni və paylaşdırılmanı, kanalizasiya sistemi üzrə isə nəqletmə, təmizlənmə və tullanmanı nəzərdə tutur.
Layihə üzrə fiziki işlərə oktyabrda başlamaq planlaşdırılıb.
Mayın 15-ə olan rəsmi məzənnə 0,8275 AZN/USD.
Müəlliflə əlaqə saxlamaq üçün elektron ünvan: [email protected]
